Георгий Степанов Үөһээ Бүлүүгэ тутуу хаамыытын бэрэбиэркэлээтэ

Бэҕэһээ, муус устар 25 күнүгэр, СӨ Бырабыыталыстыбатын Бэрэссэдээтэлин солбуйааччы Георгий Степанов үлэтинэн Үөһээ Бүлүүгэ тиийдэ.

«Георгий Михайлович Андреевскай сэлиэнньэтигэр  оҕо эмтэнэр куорпуһун тутуутун кытта билистэ, тутуу үлэтэ түргэн тэтимнээхтик баран иһэрин бэлиэтээтэ. Оҕо эмтэнэр куорпуһа (Оҕо поликлиниката) Ил Дархан Айсен Николаев өйөбүлүнэн Үөһээ Бүлүүтээҕи киин балыыһа сиригэр 2024 сылтан саҕалаан тутулла турар. 2024 сыл сайыныгар тутуу сыбаайатын түһэрии үөрүүлээх сиэригэр-туомугар Ил Дархан бэйэтинэн  кыттыыны ылбыта. Билиҥҥи туругунан тутуу бастакы этээһэ түмүктэнэн, иккис этээһи таһаарыы үлэтэ бара турар«, — диэн Үөһээ Бүлүү баһылыга Валерий Николаев бэйэтин телеграм-ханаалыгар иһитиннэрдэ.

СӨ Бырабыыталыстыбатын Бэрэсэдээтэлин солбуйааччы Георгий Степанов бүгүн, муус устар 26 күнүгэр, Үөһээ Бүлүүгэ Өрөспүүбүлүкэ күнүгэр анаммыт үөрүүлээх тэрээһиннэргэ кыттыыны ылыаҕа.