Дьокуускай куорат ытык-мааны олохтооҕо 100 сааһын туолла

СӨ Бырабыыталыстыбатын бэрэссэдээтэлин солбуйааччы Георгий Степанов Дьокуускай куорат олохтооҕун, Аҕа дойду Улуу сэриитин кыттыылааҕын огдооботун, тыыл бэтэрээнин Мария Васильевна Стрелованы ытык 100 сааһын туолбутунан эҕэрдэлээтэ.

«Мария Васильевна, биһиги эһиэхэ махтанабыт, олус киэн туттабыт. Эһиэхэ уонна эһиги чугас дьоҥҥутугар доруобуйаны баҕарабыт!», — диэтэ Георгий Степанов көрсүһүү кэмигэр.

Ил Дархан Айсен Николаев аатыттан Георгий Степанов үбүлүөйдээх ытык кырдьаҕаһы эҕэрдэлээтэ уонна 1 мөлүйүөн солк. биир кэмнээх төлөбүрдээх «Үйэ саас» бочуоттаах бэлиэни туттарда.

Мария Васильевна 1925 сыллаахха Иркутскай уобаласка төрөөбүтэ. Сэрии сылларыгар холкуоска комбайнерынан үлэлээбитэ, онтон Кыайыы уопсай дьыалатыгар истэнньэҥ дуоһунаһыгар бэйэтин кылаатын киллэрбитэ. 1972 сыллаахха Саха сиригэр уолун батыһан кэлбит. Үгүс сыллар усталарыгар араас эйгэҕэ үлэлээн-хамсаан, эппиэтинэстээхтик сыһыаннаһан үлэлээбит. 1990-с сыллартан уонна күн бүгүнүгэр диэри Перображенскай кафедральнай собор аҕам саастаах прихожанкатынан буолар.

Кэпсэтии кэмигэр кини сэрии ыар сылларын ахтан-саан ааста уонна барыларыгар ил эйэни үтүөтүн баҕарда. «Спасибо за внимание, я так рада», — диэн кини махтанна.

Георгий Степанов Мария Васильевнаҕа кытаанах доруобуйаны, уһун үйэни, тапталы, кыһамньыны баҕарда.