Герман Греф Технопаарк ситиһиилэрин кытта билистэ

Ил Дархан Айсен Николаев уонна Сбербаан салайааччыта   Герман Греф   ИТ-Пааркаҕа уонна Өрөспүүбүлүкэ цифровой трансформациятын ыстаабыгар тиийэ сырыттылар.

Ыалдьыкка өрөспүүбүлүкэҕэ цифровой эйгэҕэ ситиһиилэри, үлэлиир бырайыактары көрдөрдүлэр. Цифровой сайдыы ыстаабыгар “Биир кэлим төлөбүр докумуона” хомунаалынай өҥөлөрү төлүүр сервис үлэтин, “Паромы Якутии” устар ааллар навигацияларын кэтиир сыһыарыыны, ойуур баһаардарын утары үлэҕэ көмөлөһөр “Сильван” систиэмэни, “Северный завоз” информационнай анаалыстыыр систиэмэни кытта билиһиннэрдилэр.

ИТ-пааркаҕа “Сайберия” оҥоһук өй көмөтүнэн КТ түһэриини анаалыстааһын үлэтин, СМАРТ:ERP анаалыс дааннайдарын түмүгүнэн тэрилтэни салайыы систиэмэтин, «Ретейли» B2B атыы бырайыагын Сбер салайааччыта интэриэһигээн билистэ. Маны кытта ыалдьыттарга “Алтан” ИТ-оскуола үлэтин көрдөрдүлэр.

Цифровой сайдыы ситиһиилэрин олоххо киллэрии эйгэтигэр Сбербаан салайааччыта Герман Греф сорох бырайыактары улаханнык сэҥээрэн үөрэттэ.