Гимнастка Зарина Борисова Арассыыйаҕа бастыыр иһин күрэхтэһиигэ кыттыаҕа

Зарина Борисова уус-уран гимнастикаҕа Уһук Илиҥҥи федеральнай уокурук сүүмэрдэммит хамаандатыгар киирэн, Арассыыйаҕа бастыыр иһин күрэхтэһиигэ кыттыыны ылыаҕа.

Южно-Сахалинскай куоракка уус-уран гимнастикаҕа Уһук Илин чөмпүйэнээтэ буола турар. Манна барыта тоҕус субъектан: Еврейскэй автономнай, Сахалин уонна Амур уобаластарыттан, Хабаровскай, Камчатка, Приморскай, Забайкальскай кыраайдартан, Бурятия уонна Саха өрөспүүбүлүкэлэриттэн 170 спортсмен кытта сылдьар. Үс күннээх күрэхтэһии кэмигэр кыргыттар бөлөҕүнэн, хамаанданан уонна биирдиилээн бастыыр иһин киирсэллэр.

Бу күрэхтэһиигэ Саха сириттэн икки гимнастка кыттыыны ылар — Зарина Борисова уонна Дарья Христофорова. Кинилэр билигин иккиэн Москваҕа аатырбыт Ирина Винер киинигэр Валерия Шкред, Екатерина Иванова уонна Олеся Петрова диэн тириэньэрдэргэ дьарыктаналлар. Дарьялаах Зарина былырыын Владивостокка ыытыллыбыт «Азия оҕолоро» спортивнай оонньууга кыттыбыттара.

Бу чөмпүйэнээт буолуон аҕай иннинэ Хабаровскайга успуорт бастакы разрядыгар уонна успуорт маастарыгар хандьыдаат бырагырааматынан дьарыктанар оҕолорго уокуруккка бастыыр иһин күрэс түмүктэннэ. Манна өрөспүүбүлүкэ сүүмэрдэммит хамаандата төрдүс миэстэни ылла. Тэҥнээн көрдөххө, бу күрэхтэһиигэ икки сыллааҕыта кыргыттар 7-c, былырыын 5-с буолбут буоллахтарына, быйыл көрдөрүү биллэ тупсубут. Оттон биирдиилээн күрэхтэһиигэ сытыы киирсиигэ Зарина Борисова 4-с миэстэни ылары ситистэ уонна уокурук сүүмэрдэммит хамаандатыгар киирэн, Москваҕа Арассыыйаҕа бастыыр иһин күрэхтэһиигэ кыттар кыахтанна. Онон инники кыайыыларга эрэниэхэйиҥ уонна кыргыттары, тириэньэрдэри эҕэрдэлиэҕиҥ!