Гимназияҕа итии уу турбата тэстэн, уол оҕо эчэйбит

Дьокуускай куорат национальнай гимназиятыгар 17 саастаах уол итии уу турбата тэстэн эчэйбит. СӨ Доруобуйаҕа харыстабылын министиэристибэтигэр иһитиннэрбиттэринэн, быраастар үөрэнээччи туругун орто ыарахан диэн сыаналыыллар.

«Өрөспүүбүлүкэтээҕи 2 №-дээх балыыһа – Суһал мэдиссиинэ көмөтүн киинин салаатыгар итии ууга буспут 17 саастаах уол киирдэ. Кинини быраастар көрдүлэр, туруга орто ыарахан диэн сыаналанар. Үөрэнээччигэ туох баар наадалаах көмө оҥоһуллар», — диэн  Доруобуйа харыстабылын министиэристибэтиттэн кэпсээтилэр.

СӨ Үөрэҕин уонна билимин министиэристибэтигэр үөрэх тэрилтэтигэр хомунаалынай саахал тахсыбытын бигэргэттилэр. Быһылаан төрүөтэ уонна хоромньута чуолкайданаллар.