«Голос с фронта» аудиовизуальнай быыстапка аһыллыаҕа

Ярославскай аатынан Дьокуускай түмэлэ Кыайыы 80 сылын көрсө «Не померкнут эти дни…» бырайыак чэрчитинэн, араас тэрээһиннэри ыытар. Муус устар 18 күнүгэр «Голос с фронта» аудиовизуальнай быыстапка аһыллыаҕа.

Бу быыстапкаҕа саллаат Н.В. Егоров фронтан ыыппыт суруктарын эт куолаһынан ааҕалларын истиэххэ сөп. Кини 1942 сыллаахха сэриигэ ыҥырыллыаҕыттан, хайдах айаннаан тиийбитин, үөрэммитин, кыргыһыыларга кыттыбытын, дьиэтин, дойдутун ахтарын суруйбут. Сталингрда, Орел, Бухарест, Будапешт, Вена иһин кыргыһыыларга кыттыбыта, Кыайыы көтөллөөх эргиллэн кэлбитэ. Онон ол уордаах сыллары, уоттаах сэриини кини хараҕынан көрөр курдук буолуоххут, саллаат куолаһын истиэххит.

— Саха сиригэр аан бастаан, биһиги түмэлбитигэр докумуоннар маннык ураты көрүҥүнэн дьоҥҥо тахсыахтара. Быыстапка урукку уонна аныгы технологиялары дьүөрэлээн, дьоҥҥо тиийэр курдук өйдөнүмтүөтүк устуоруйа түгэннэрин кэпсиэҕэ. Ордук эдэр дьоҥҥо маннык ньыма өйдөнүмтүө, кэрэхсэбиллээх буоларыгар саарбахтаабаппыт. Үүнэр көлүөнэни патриотическай иитиигэ биир дьоһун хардыы буолар, —  диэн бырайыак куратора Сергей Слепцов кэпсээтэ.

Быыстапкаҕа куолаһы, муусуканан доҕуһуолу эрэ истибэккин, саллаат Николай Егоров хаартыскаларын, уруһуйдарын, тус малларын көрүөххэ сөп.

Ыспыраапка

Николай Васильевич Егоров (1903-1983) Бүлүү улууһун Куорамыкытыгар төрөөбүтэ. «Кыһыл Сулус», «Үлэ Кыһыл знамята», Ленин уордьаннардаах, 5 бойобуой мэтээллээх. САССР, РСФСР үтүөлээх учуутала.

1929-1930 сылларга Таатта улууһун Игидэй оскуолатын салайбыта. 30-с сылларга кини салалтатынан «Сайдыы суола», «Ааҕар кинигэ», кэлин «Родная речь» учуобунньуктар тахсыбыттара.

1945-1954 сылларга Дьокуускай куорат 2-с №-дээх оскуолатын завуһунан үлэлээбитэ. 1954 сылтан ЯРИУУ начаалынай кылаастар, педагогика кэбиниэтин сэбиэдиссэйинэн үлэлээбитэ.