«Гордость нации – 2025» бириэмийэ лауреата — Айтал Коркин

Саха сириттэн Айтал Коркин «Гордость нации – 2025» бириэмийэ эрэгийиэннэр икки ардыларынааҕы түһүмэҕин «Судаарыстыбаннай национальнай бэлиитикэни информационнай өттүнэн хааччыйыыга киллэрбит кылаатын иһин» номинацияҕа лауреат буолла. Кини Алексей Кулаковскай аатынан Норуоттар доҕордоһууларын дьиэтин сырдатар уонна маркетинговай үлэтин салаатын салайааччыта.

«Биһиги салаабыт сүрүн соруга – убаастабылга уонна бэйэ-бэйэни өйдөһүүгэ олоҕурбут биир кэлим информационнай эйгэни тэрийии. Биһиги үлэбит – сонуннар уонна бырайыактар көмөлөрүнэн култууралар икки ардыларыгар далаһа буолар. Чопчу бырайыактар тустарынан эттэххэ, бу – «Доҕордоһуу төрөөбүт тыла» диэн тыас уһулар АРТ-устуудьуйа. Онно Саха сирин норуоттарын төрөөбүт тылларын уонна муусукаҕа этническэй култуураларын нэһилиэстибэтин харыстыыр уонна байытар саҥа технологиялар туһаныллаллар. Бу бырайыак национальнай-култуурунай түмсүүлэр, айар кэлэктииптэр уонна солистар уус-уран самодеятельностарын таһымын үрдэтиигэ туһуланар», — диэн Айтал Коркин кэпсээтэ.

Салаа өссө биир киэн туттуутунан «Сахалыы кэпсэтиэҕиҥ» бырайыак буолар. Барыта саха тылын үөрэтэргэ уонна саха култууратын кытта билсэргэ көмөлөһөр 26 уруок уһулунна. Ону таһынан кинилэр Норуоттар доҕордоһууларын дьиэтэ ыытар бары тэрээһиннэрин уонна бэстибээллэрин информационнай өттүнэн хааччыйыынан дьарыктаналлар.

«Быыстапка үлэтин тэрийиинэн дьарыктанабыт. Манна киирэллэр: концептуальнай быһаарыылары оҥоруу, экспозициялар тас көстүүлэрин киэргэтии, быыстапкалары-экспозициялары бэлэмнээһин, дизайн-макеты оҥоруу. Ону таһынан биһиги Норуоттар доҕордоһууларын дьиэтин тэрээһиннэрин полиграфическай бородууксуйатын оҥорон таһаарыытын толоробут: афишалартан уонна буклеттартан саҕалаан, наҕараада атрибутикатыгар тиийэ. Биһиги дьоҥҥо-сэргэҕэ өрөспүүбүлүкэбитигэр уонна дойдубутугар олорор норуоттар баай култуураларын, үгэстэрин уонна сиэрдэрин-туомнарын көрөллөрүгэр көмөлөһөбүт. Араас омук буолуу – бу биһиги уопсай баайбыт диэн көрдөрө сатыыбыт», — диэн Коркин бэлиэтээтэ.

«Гордость нации – 2025» бириэмийэ эрэгийиэннэр икки ардыларынааҕы түһүмэҕин лауреаттарын наҕараадалааһын субуотаҕа, алтынньы 11 күнүгэр, Дьокуускайга Норуоттар доҕордоһууларын дьиэтигэр буолуоҕа. Ону таһынан төгүрүк остуоллар ыытыллыахтара, онно Уһук Илин эрэгийиэннэриттэн лауреаттар бэйэлэрин уопуттарын кытта билиһиннэриэхтэрэ. Федеральнай түһүмэх кыайыылаахтарын сэтинньи саҥатыгар биллэриэхтэрэ.