Горнай Бэрдьигэстээҕэр фонтан үлэлиир, кус устар, тайах күүлэйдиир

Горнай улууһун Бэрдьигэстээх нэһилиэгин  Таралҕан күөлүгэр фонтан үлэлээтэ. 

Былырыын  күһүн олохтоох дьаһалта бэйэ көҕүлээһинин бырагырааматыгар киирсэн, фонтаны туруорбута. Күөлгэ ону тэҥэ кустар уста сылдьаллар.

Онон нэһилиэк олохтоохторо үлэ чааһын кэнниттэн сайыҥҥы  чуумпу киэһээлэргэ манна кэлэн сынньанан барар буоллулар.

Аны Горнай улууһун маанылаах кыыла тайах Бэрдьигэстээх уонна Маҕарас суолун икки ардыгар холкутук сылдьарын видеоҕа устубуттар.

Онон горнайдар айылҕа мааныылаах көтөрдөрө уонна кыыллара аргыстаах күөх сайыны көрүстүлэр. Бу туһунан нэһилиэк телеграм-ханаалыгар олохтоох пресс-киин суруйда.