Горнай Бэрдьигэстээҕэр Пиэрибэй Маай уратытык бэлиэтэммитин дьон сөбүлээтэ

Бүгүн Горнай улууһун Бэрдьигэстээҕэр Эйэ, Үлэ, Маай бырааһынньыгын  күнүгэр  үлэ кэлэктииптэрин икки ардыларыгар үлэ күрэҕэ буолан ааста.

Сааскы дьоро күн бырааһынньыгын туһунан Бэрдьигэстээх сэлиэнньэтин баһылыгын солбуйааччы Ксенья Васильева бу курдук кэпсээтэ:

— Үлэ бырааһынньыгар Л.Е. Лукина аатынан эбии үөрэхтээһин киинэ, С.П. Данилов аатынан Бэрдьигэстээх орто оскуолата, Култуура үлэһиттэрэ, «Сардаана» уһуйаан, киин балыыһа, «Кырачаан ымыылар», «Родничок», «Кэнчээри» уһуйаан үлэһиттэрин холбоһуктаах хамаандалара көхтөөх кыттыыны ыллылар.

Бастакы көрүҥүнэн хаарбах дьиэлэр оннуларын хомуйууга субуотунньук ыытылынна. 10-нуу киһилээх 6 хамаанда 30 мүнүүтэ иһигэр ким төһө элбэҕи ыраастыырыгар, хомуйарыгар күрэхтэстилэр.

Бүгүн «Старый Бердигестях» искибиэргэ элбэх киһи тоҕуоруста, атыы-кутуу тэрилиннэ. Улуус, нэһилиэк бас-көс дьоно Н.В. Андреев, А.Г. Аргунов норуоту бырааһынньыгынан эҕэрдэлээтилэр, бастыҥ үлэһиттэри бэлиэтээтилэр. Ол кэннэ күрэхпит салҕанна — хамаандалар иккис түһүмэҕинэн бэйэлэрин хамаандаларын билиһиннэрдилэр.

Үһүс түһүмэххэ П.Д. Аввакумов аатынан киин бибилэтиэкэ эдэр исписэлиистэрэ  Пиэрибэй Маай тиэмэтигэр   араас боппуруостаах викторина, «Үлэ» диэн тыллаах өс хоһооннору таайыы уонна хартыынаны үтүктүү күрэһин тэрийэн ыыттылар.

Бүтэһигэр хамаандаларбыт талааннарын көрдөрөн, ырыа-тойук аргыстаах, үҥкүү кэһиилээх нүөмэрдэрин көрөөччүлэргэ бэлэх ууннулар. Бу тэрээһини Мэхээлэ Дьөгүөрэп аатынан сынньалаҥ киинэ иилээн-саҕалаан ыытта.

Бэрдьигэстээх дьаһалтатын юриһа Михаил Салгынов, улуус дьаһалтатын исписэлииһэ Эльвира Жиркова уонна ЖКС тэрилтэ салайааччыта Анатолий Лю-фа састааптаах дьүүллүүр сүбэ быһаарыытынан, 1-кы миэстэни Л.Е. Лукина аатынан эбии үөрэхтээһин киинэ ылан, 10 тыһыынча солкуобай сууммалаах харчынан бириискэ тигистэ. 2-с миэстэни «Сардаана» уһуйаан ылан,  7 тыһ. солк. харчыга тигистэ. 3-с миэстэни «Кырачаан ымыылар», «Родничок», «Кэнчээри» уһуйаан үлэһиттэрин холбоһуктаах хамаандалара ылла уонна 5 тыһ.солк. бириистэннэ. Кыттааччыларга барыларыгар харчынан бирииһи улууспут араас тэрилтэлэр идэлээх сойуустара уйуннулар.

Эбиэт кэннэ Ыччат бэлиитикэтин уонна успуорт ааҕыныстыбата  ипподромҥа үгэс быһыытынан  хаһыс да сылын тэрийэр «Үлэ күүһэ» күрэҕин ыытта.

ОДьКХ, «Авиалесоохрана», «Дьулуур», «Тяги возвращение» хамаандалар бастыыр иһин кииристилэр. Бэрдьигэстээхпит эр дьоно мас эрбээһинигэр,  хайытыытыгар, эрбэммит маһы сааһылааһыҥҥа күрэхтэстилэр.

Бэлэмнээбит саһааннара оттук маска наадыйар байыаннай дьайыы  кыттыылаахтарын дьиэ кэргэннэригэр тиэрдиллиэҕэ.

Ону таһынан, хамаандалар икки тутаахтаах эрбиинэн эрбээһиҥҥэ, эстэпиэтэҕэ, хомуур мас тардыһыытыгар күөн көрүстүлэр.

Уопсай түмүккэ 1-кы миэстэни «Дьулуур», 2-с миэстэни —  ОДьКХ, үһүс «Тяги возвращение» ыллылар.

Быйылгы Маай бырааһынньыга Бэрдьигэстээх нэһилиэгэр олус уратытык бэлиэтэннэ.

Ыам ыйын 1 күнүн субуотунньугунан, мас саһаанынан, дьон сынньалаҥын сонуннук тэрийиини олохтоохтор олус сөбүлээтилэр, киһи барыта үөрдэ, бырааһынньыктааҕы сааскы көххө кытынна.