Горнай Маҕараһыгар саҥа турбааза аһылынна

Горнай улууһугар туризмы сайыннарыыга олохтоох урбаанньыттар көхтөөхтүк үлэлэһэллэр. 

Бу күннэргэ Горнай улууһугар Маҕараска урбаанньыт Дмитриевтэр дьиэ кэргэттэрэ «Сайдам Глэмпинг»  туристическай баазаны үөрүүлээх быһыыга-майгыга астылар.

Туркомплекс тупсаҕай оҥоһуулаах сынньанар биэс дьиэлээх.  Бу СӨ урбааҥҥа, эргиэҥҥэ уонна туризмҥа министиэристибэтин өйөбүлүнэн судаарыстыбаннай инвестиционнай бырайыагы өйүүр федеральнай бүддьүөттэн көрүллэр уонна Горнай улууһун муниципалитетын  бүддьүөтүттэн тыырыллыбыт субсидияларынан  тутулунна.

Тустаах министиэристибэ, улуус уонна урбаанньыт бэйэ-бэйэлэрин кытта биир хайысханан үлэлииллэрин түмүгэ — туризм салаатыгар саҥа суолу тэлэр «Сайдам Глэмпинг» олоххо киириитэ. Дьиэ кэргэн сылыгар турбааза хаһаайыттара Дмитриевтэр  улуустарыгар уонна бэйэлэригэр бэртээхэй бэлэҕи оҥордулар. Эдэр урбаанньыт ыалга сонунтан сонун сүүрээннэри тобула туралларыгар баҕарабыт!