Горнай Маҥанытыгар — дьиэ кэргэн пуорума

Бу күннэргэ  күн чэрчитинэн өрөспүүбүлүкэҕэ — Ийэ, Горнай  улууһун Маҥаны нэһилиэгэр Дьиэ кэргэн сылларынан сибээстээн,  «Бигэ туруктаах дьиэ кэргэн» улуустааҕы пуорум буолан ааста.

 Суолталаах тэрээһиҥҥэ Нам улууһуттан Хамаҕаттаттан уонна Аппааныттан “Аҕа түмсүүтэ» уопсастыбаннай тэрилтэлэриттэн, Бэрдьигэстээх сэлиэнньэтиттэн, Малтааны, Кировскай уонна Солоҕон нэһилиэкиэриттэн анал дэлэгээссийэлэр кэлэн кыттыыны ыллылар. Ыҥырыылаах  ыалдьыттарынан 2017 сыллаахха өрөспүүбүлүүкэтээҕи Дьиэ кэргэн куонкуруһун «Тыа ыала» номинация кыайыылаахтара,  Мэҥэ Хаҥалас улууһун Бүтэйдээҕиттэн Ньургуйаана уонна Афанасий Прокопьевтар, улуус бастыҥ дьиэ кэргэнэ Валентина уонна Степан Пахомовтар буоллулар. Ньургуйаана Семеновна Маҥаныттан төрүттээх.

Маҥаны — өрөспүүбүлүкэтээҕи дьиэ кэргэн куонкурустарын араас сыллардааҕы кыайыылаахтара олорор түөлбэлэрэ. Ол курдук, 2017 сыл улуустааҕы дьиэ кэргэн күөн күрэһин кылаан кыайыылаахтара Алена Николаевна, Гаврил Гаврильевич Григорьевтар, 2018 сыллаахха өрөспүүбүлүкэтээҕи эмиэ бу куонукурус кыайыылаахтара:  «Эдэр дьиэ кэргэн» номинация  хаһаайыттара, Маҥаны нэһилиэгиттэн төрүттээх Туяра Семеновна, Федор Саввич Максимовтар, 2019 сыллаахха  “Тыа ыала” номинация бастыҥнара Ксения Анатольевна, Алексей Петрович Вензеллэр, 2021 сыллаахха «Тыа ыала» номинация кыайыылахтара Сахая Алексеевна, Виталий Александрович Илюхиннар дьиэ кэргэттэрэ тэрээһин бочуоттаах кыттыылаахтарынан буоллулар.

Маҥаны нэһилиэгин дьаһалтата 2022 сылы Дьиэ кэргэн сылынан биллэрбитэ. Онон  «Бигэ туруктаах кэргэн» улуустааҕы пуорум бу нэһилиэккэ анаан ыытылынна. Тэрээһин 4  былаһаакканан барда: 1-кы сиэксийэ «Доруобуйа уонна уйулҕа», 2-с сиэксийэ: «Дьиэ кэргэн — норуот кэскилэ», 3 -с сиэксийэ: «Дьиэ кэргэн эбии дохуота», 4 -с сиэксийэ: «Дьиэ кэргэни хамсатар күүс — аҕа».

Пуорум кыттыылаахтара бэрт туһалаах маастар-кылаастарга кытыннылар: кээнчэ тигиитигэр Маҥаны нэһилиэгиттэн Мария Степанова, Бэрдьигэстээхтэн оhyop оҕуруону анньыыга Марина Николаева уһуйдулар. Маалтааныттан анал бырайыагы оҥорууга тэттик сүбэлэри Алена Григорьева биэрдэ.  Солоҕонтон кэлбит Валентина, Степан Пахомовтар хомуска, хаартыскаҕа түһэриигэ Маҥаныттан Ксения Вензель, үҥкүүгэ  Бэрдьигэстээхтэн Алексей Попов, шеллак оҥорууга Маҥаныттан Александра Сивцева, Бэрдьигэстээхтэн Туяра Максимова үөрэттилэр.

Улуустааҕы дьиэ кэргэн пуорума ыалдьыттары кытта холбоһуктаах кэнсиэринэн түмүктэннэ.

Ити курдук, горнайдар саха омугу тыынныыр, кэскили түстүүр дьиэ кэргэн, аҕа баһылыктарыгар, күн күбэй ийэлэригэр урааҥхай саха удьуора үксүүрүгэр олук уурар бэрт кэрэхсэбиллээх тэрээһини тэрийдилэр.

Хаартыска: Анастасия Максимова түһэриитэ.