Горнай оройуонугар трассаҕа микроптуобус түҥнэстибит, түөрт киһи эмсэҕэлээбит

«Бүлүү» трассатыгар бэҕэһээ, кулун тутар 2 күнүгэр, уон пассажирдаах «Хайс» микроптуобус түҥнэстибит. Түөрт киһи эмсэҕэлээбит.

Госавтоинспекция пресс-сулууспата иһитиннэрэринэн, суол саахала «Бүлүү» трассатын 64-с километрыгар киэһэ 22.00 чаас саҕана тахсыбыт. Дьокуускайтан Ньурбаҕа айаннаан испит микрооптуобус суоппара халтарааҥҥа суолтан туораабыт уонна түҥнэстибит. «Хайс» тырааныспарынан уон пассажир айаннаан испит, түөрт киһи араас эчэйиини ылбыт. Үс эмсэҕэлээбиттэргэ амбулаторнай эмтэнии ананна. Улахан эчэйиини ылбыт саастаах дьахтар балыыһаҕа киирдэ.

Санатан эттэххэ, бу иннинэ, муус устар 1 күнүгэр, «Бүлүү» трассатыгар Горнай оройуонун Орто Сурт сэлиэнньэтиттэн чугас суол саахала тахсыбыта. Саахал түмүгэр 13 киһи эмсэҕэлээбитэ, ол иһигэр биэс оҕо.