Горнай улууһугар былаас уорганнарын салайааччыларыттан олохтоохтор үгүс боппуруоска сүбэ ыллылар

Горнай улууһугар ыытыллыбыт ситэриилээх былаас отчуотун мунньаҕар кэлбит дьон эбии суруттаран, салайааччылары кытта көрсөн, бэйэлэрин тустаах боппуруостарын ырыттылар, санаа атастаһан, сүбэ ыллылар.

СӨ Тыа хаһаайыстыбатын министиэристибэтин судаарыстыбаннай бырагыраамалары былаанныыр, билгэлиир департаменын салайааччы Анастасия Колодезникова Горнай улууһун Бэс Күөлэ уонна Күөрэлээх нэһилиэктэригэр ыытыллыбыт отчуоттарга уопсайа аҕыс киһини кытта көрүстэ. Ол курдук, дьон от тиэйиитин, сири нүөлсүтүү, оҥоруу боппуруостарын туруорустулар. «Быйылгыттан сири оҥорууга судаарыстыбаннай бүддьүөттэн элбэх көмө көрүллэр буолла. Өйөбүл туруорсааччы министиэристибэҕэ сайаапка түһэрэр. Суумата үлэтин оҥорор бырайыагыттан тутулуктаах. Ол ону сиһилии быһааран биэрдим. Ити эҥээр нэһилиэктэр ходуһалара ууга баран, сүрүннээн туруорсар боппуруостара ити. Ону тэҥэ мобильнай биригээдэлэр көмөлөрүгэр сыһыаннаах боппуруоһу түөрт киһи туруоруста. Быйыл былааҥҥа мобильнай биригээдэлэргэ үбүлээһин көрүллүбүтэ. Ким кыһалҕалаах, көмөҕө наадыйар дьон улуус салалтатыгар сайаапка түһэрэр. Баһылыктар министиэристибэни кытта кэпсэтэн, ити боппуруоһу быһаараллар. Олохтоохтору кытта сирэй көрсөн, кэпсэтэн баран, дьон-сэргэ буола турар уларыйыылары кыраҕытык кэтээн көрөллөр, үөрэтэллэр эбит диэн санааҕа кэллим. Онон бэлэмнээх дьону кытта кэпсэтии сүбэ-ама курдук барда, икки өттүттэн бэркэ өйдөстүбүт», — диэн Анастасия Колодезникова санаатын үллэһиннэ.

СӨ Уһук Илиннээҕи уокуругун бастайааннай бэрэстэбиитэлистибэтин салайааччыта СӨ Бэрэссэдээтэлин солбуйааччы Ким Борисовка Маҕарас олохтооҕо Марта Максимова «Өркөн» ТОС олохтоохторо саҥа хочуолунай туруорсалларын тиэртэ.

Бэрдьигэстээх сэлиэнньэтин салайааччылара СӨ тутууга миниистирин солбуйааччы Галина Новикованы кытта көрсөн тутуу боппуруостарын быһаарыстылар.

Бүгүн Бэрдьигэстээххэ суруйааччылар Семен уонна Софрон Даниловтар ааттарынан Духуобунас киинигэр ситэриилээх былаас салайааччылара тоҕус киһини кытта көрүстүлэр. Онно эбийиэктэри уонна олорор дьиэлэри салгыы гаастааһын, сайыҥҥы оҕо лааҕырын тутуу, адаптивнай успуорт киинин Горнайга арыйыы, сааһын ситэ илик оҕолор социальнай реабилитационнай кииннэрин тутуу, култуура тэрилтэлэрин, Бэрдьигэстээххэ урукку мас дьиэ оннугар саҥа кулууп дьиэтин тутуу, искусственнай ардаҕы түһэриини былааннааһын курдук боппуруостары ырыттылар.