Горнай улууһугар күүстээх тоҥоруу түспүт

Бөлүүн атырдьах ыйын 18 күнүгэр Горнай улууһун Бэрдьигэстээх сэлиэнньэтигэр күүстээх тоҥоруу түспүт.

Бу туһунан СИА-ҕа  Бэрдьигэстээх олохтооҕо Василий Алексеев иһитиннэрдэ. Сарсыарда туран кини буочука уута мууһурбутун бэлиэтээбит.

«Үгүс улуустарынан маннык күүстээх тоҥоруу өссө түһэ илик диэн билэбин.  Горнай улууһун олохтоохторун маннык сонун соһуппат, билигин атырдьах ыйа буолан тоҥоруу түһэрэ эрдэ биллэр этэ. Былырыын бастакы тоҥоруулар өссө от ыйыгар түспүттэрэ. Бэрдьигэстээххэ, Ааһымаҕа, Өрткө Маҥараска номнуо хаһыс да күнүн тоҥордо. Нэһилиэк олохтоохторо кыстыкка бэлэмнэнэллэр», — диэн бэлиэтээтэ Василий Алексеев.

Санатан эттэххэ, бүгүн кэккэ улуустарынан тоҥоруу түһэрэ күүтүллэр.