Горнай улууһун тэтимнээх сайдыыта — саҥа кинигэҕэ

     Улуус историятын олорор, үлэлиир дьоно-сэргэтэ, тэрилтэлэр оҥороллор. Горнай улууһа экономика уонна социальнай эйгэ сүрүн көрдөрүүлэригэр өрөспүүбүлүкэҕэ муниципальнай оройуоннар ортолоругар биир бастыҥ улууһунан буолар. Сахабыт сирэ сайдыытыгар бэйэтин дьоһун кылаатын киллэрэр.

Кэлиҥҥи уон сылга улуус тэтимнээхтик сайынна. Горнай улууһа бүгүн гаастаах, үчүгэй суоллаах-иистээх, элбэх саҥа дьиэ-уот,  социальнай эбийиэк тутуллан, нэһилиэнньэтин ахсаана элбээн иннин диэки киэҥник хардыылаан иһэр. Улуус историятын, сайдыытын, ситиһиитин үйэлэри уҥуордаан сурукка тиһиллэн «Горный улус на рубеже веков» саҥа кинигэ сүрэхтэннэ.

«Горный улус на рубеже веков» кинигэ 2010 сылтан 2021 сылга диэри кэмҥэ олохтоох дьаһалталар, тэрилтэлэр биэрбит матырыйаалларыгар, хаартыскаларыгар уонна улуус социальнай-экономическай, култуурунай-духуобунай сайдыытыгар кылааттаах дьон туһунан киирбит матырыйаалларга олоҕуран оҥоһуллунна.

Кинигэ матырыйаалын хомуйан бэчээккэ бэлэмнээтилэр Горнайдааҕы кииннэммит бибилэтиэкэ ситимин үлэһиттэрэ. Эрэдээксийэлиир кэллиэгийэҕэ «Горнай улууһа» муниципальнай оройуон баһылыгын бастакы солбуйааччыта Сардаана Стручкова, РФ суруналыыстарын сойууһун чилиэнэ, СӨ суруналыыстыкаҕа судаарыстыбаннай бириэмийэтин лауреата, СӨ култууратын үтүөлээх үлэһитэ Василий Алексеев, П.Д. Аввакумов аатынан киин бибилэтиэкэ бибилэтиэкэрэ Саргылаана Михайлова, РСФСР үтүөлээх учуутала Любовь Андреева үлэлээбиттэр.

Улууспут 10 сылга сайдыытын көрдөрөр «Горный улус на рубеже веков» Горнай улууһа муниципальнай тэриллии (баһылык Никита Викторович Андреев, солбуйааччы Сардаана Степановна Стручкова) көҕүлээһининэн уонна үбүлээһининэн Дьокуускайга «Дани-Алмас» хааччахтаммыт эппиэтинэстээх тэрилтэҕэ бэчээттэннэ. 500 экземплярдаах, халыҥ хахтаах, 375 сирэйдээх, өҥөөх, үрдүк хаачыстыбалаах кинигэ буолан таҕыста. Бу кинигэ «Горный улус. История. Культура. Фольклор»  Горнай улууһа сайдыытын сырдатар бастакы улахан кинигэ салгыыта буолар.

Кинигэ сүрэхтэниитигэр «Горнай улууһа» муниципальнай оройуон баһылыга Андреев Никита Викторович, улуус дьокутааттарын сэбиэтин бэрэссэдээтэлэ Тарасов Алквиад Александрович, кинигэ эрэдээктэрэ Алексеев Василий Ильич, кинигэҕэ суол, олох-дьаһах хаһаайыстыбатын тэрилтэлэрин  ыстатыйаларыгар үлэлэспит Захаров Матвей Семенович, Уйгуров Иван Николаевич уонна да атыттар кыттыыны ыллылар.

Хаҥаластан төрүттээх, Кэбээйиттэн утумнаах, Бүлүүлэртэн булкаастаах, Намтан кыра тардыылаах аныгы олох тэтимин кытта тэҥҥэ үүнэр-сайдар тапталлаах Горнайбыт улууһун бүгүҥҥү күнүн түстүүр, сарсыҥҥытын салайсар улууспут бары олохтоохторо биир санааны тутуһан сайдыы суолун туталлар.

Анастасия Сергеева,

П.Д.Аввакумов аатынан киин бибилэтиэкэ бибилэтиэкэрэ.

Горнай.

Хаартыскаларга П.Д.Аввакумов аатынан киин бибилэтиэкэ сэбиэдиссэйэ Лена Саввинова, Милона Иванова түһэриилэрэ.