Горнай улууһун ытык кырдьаҕаһа Мария Тарасова 100 сааһын бэлиэтиир

Бүгүн Горнай улууһа бэлиэ түгэни – улуус олохтооҕо, тыыл уонна үлэ бэтэрээнэ Мария Григорьевна Тарасова 100 саастаах үбүлүөйүн бэлиэтиир. Кинини үйэлээх үбүлүөйүнэн СӨ  Ил Дархана Айсен Николаев эҕэрдэлээтэ.

«Эһигини Улуу Кыайыы 80 сылын сылыгар 100 сааскытын туолбуккутунан ис сүрэхпиттэн эҕэрдэлиибин! Бу бүтүн Саха сиригэр бэлиэ уонна үөрүүлээх түгэн. Сэрии сылларыгар да, эйэлээх кэмҥэ да дьоруойдуу үлэҕит иһин Эһиэхэ махтанабыт. Эһиги хорсун быһыы, тулуур, иэскэ бэриниилээх буолуу, Аҕа дойдуга бэйэни харыстаммакка сулууспалааһын чаҕылхай холобура буолаҕыт. Чиэһинэй, бэйэни харыстаммакка үлэҕитинэн Аҕа дойду Улуу сэриитигэр Кыайыыга уонна өрөспүүбүлүкэ, дойду социальнай-экэнэмиичэскэй сайдыытыгар улахан кылааккытын киллэрбиккит», – диэн Ил Дархан эҕэрдэ суругар этиллэр.

Бу бэлиэ түгэн чиэһигэр Мария Григорьевнаҕа «Үйэ саас» Бочуоттаах бэлиэтин үөрүүлээх быһыыга-майгыга туттардылар. Наҕараадаҕа 1 мөлүйүөн солкуобай кээмэйдээх биир кэмнээх төлөбүр ананар.

Мария Григорьевна Тарасова 1925 сыл алтынньы 20 күнүгэр Горнай улууһун Солоҕон нэһилиэгэр төрөөбүтэ. Кини олоҕо – төрөөбүт дойдуга бэриниилээх буолуу уонна бэйэни харыстаммакка үлэлээһин холобура. Аҕа дойду Улуу сэриитин сылларыгар счетоводунан уонна биригэдьииринэн үлэлээн, уопсай кыайыыга бэйэтин кылаатын киллэрбитэ.

Сэрии кэннинээҕи кэмҥэ Мария Григорьевна олоҕун култуура уонна уопсастыбаннай олох сайдыытыгар анаан, ааҕар балаҕан сэбиэдиссэйинэн, нэһилиэк сэбиэтин сэкирэтээринэн үлэлээбитэ. Өрөспүүбүлүкэ уонна дойду иннигэр өҥөлөрүн, уһун сыллаах чиэһинэй үлэтин иһин Мария Григорьевна «1941-1945 сс. Аҕа дойду Улуу сэриитин сылларыгар килбиэннээх үлэтин иһин», «В.И. Ленин төрөөбүтэ 100 сылыгар килбиэннээх үлэтин иһин» мэтээллэринэн уонна Саха АССР Үрдүкү Сэбиэтин Президиумун Бочуотунай кыраамататынан наҕараадаламмыта.

Кини – Горнай улууһун Бочуоттаах олохтооҕо, Солоҕон уонна Бэрдьигэстээх нэһилиэктэрин Бочуоттаах олохтооҕо, СӨ Бочуоттаах бэтэрээнэ, СӨ «Ытык сүбэ» Бочуоттаах ытык кырдьаҕаһа буолар. Итини таһынан, Мария Григорьевна саха култууратын харыстааһыҥҥа уонна сайыннарыыга улахан кылааты киллэрбитэ. Кини – норуот тылынан уус-уран айымньытын биллиилээх хараанньыта, хомусчут-импровизатор. 2010 сыллаахха Мария Григорьевна «Саха Өрөспүүбүлүкэтин норуотун уус-уран айымньытын сайдыытыгар киллэрбит кылаатын иһин» бэлиэнэн наҕараадаламмыта.