Горнайдар кинигэ биһирэмигэр түмүстүлэр

Аҕа дойду сэриитигэр Улуу Кыайыы үбүлүөйдээх 80 сылын тэрээһиннэрин түмүктүүр «Уоттаах сэрии сылларыгар» кинигэ биһирэмэ Бэрдьигэстээххэ Петр Аввакумов аатынан киин модельнай бибилэтиэкэҕэ буолла.

Сэрии ыар сыллара, харах уулаах, сут уонна кураан, өлүү-сүтүү сатыылаабыт иэдээннээх кэмнэрэ. Хаан тохтуулаах киирсиилэргэ биһиги биир дойдулаахтарбыт, Горнай оройуонуттан 1070 киһи ыҥырыллан, хорсуннук сэриилэспиттэр. Кинилэр ортолоругар 531 буойун Ийэ сири өстөөхтөн босхолоору сырдык тыыннара кырыыстаах сэрии хонуутугар быстыбыта. Тыылга хаалбыт кырдьаҕастар, оҕолор, дьахталлар бэриниилээх үлэлэринэн Улуу Кыайыыны уһансыбыттара. Алдьатыылаах сэриигэ бааһыран, эчэйэн сыккырыыр тыыннара эрэ ордон кэлбит саллааттар, аны, эйэлээх олоҕу тутууга туруммуттара. Аҕа дойду уоттаах сэриитигэр Улуу Кыайыы өрөгөйө аҕа көлүөнэ дьоммут хорсун быһыыларынан, эр санааларын, бэйэни харыстаммат күүстээх үлэлэринэн ситиһиллибитэ.

Горнайдар сэриигэ кыттыыларын туһунан кыраайы чинчийээччи Терентий Романович Капитонов хомуйан оҥорбут 1995 сыллаахха тахсыбыт «Уоттаах сэрии сылларыгар» кинигэ 30 сыл буолан баран, ааттара-суоллара эбии чуолкайданан, бу күннэргэ бэчээттэнэн күн сирин көрдө.

Сыллар аастахтарын аайы, Кыайыы суолтата өлбөөдүйбэт. Бу улуу күн эдэр көлүөнэни Ийэ дойдуну төлөннөөхтүк таптыырга, ааспыт олоҕу сыаналыырга үөрэтэригэр эрэнэбит.

Кинигэни хомуйда, бэчээккэ бэлэмнээтэ – ааптар РФ Суруналыыстарын сойууһун чилиэнэ, суруналыыстыкаҕа кылаатын иһин судаарыстыбаннай бириэмийэ лауреата, СӨ култууратын үтүөлээх үлэһитэ, Горнай улууһун бочуоттаах олохтооҕо, суруналыыс, кыраайы үөрэтээччи Василий Ильич Алексеев. Аҕа дойду сэриитин кыттыылаахтарын туһунан эбии чуолкайдааһыҥҥа Василий Ильиһы кытта Василий Иванович Дьячковскай, Юрий Викторович Потапов үлэлэстилэр. Ону тэҥэ Горнайдааҕы кииннэммит бибилэтиэкэ ситимин филиалларын бибилэтиэкэрдэрэ, М.Е.Тимофеев аатынан Бэрдьигэстээхтээҕи кыраайы үөрэтэр түмэл үлэһиттэрэ нэһилиэктэрин историятын, дьонун-сэргэтин үйэтитиигэ улууска тахсар кинигэлэргэ кыһамньыларын ууран, булан-талан, кэпсэтэн-ипсэтэн утумнаахтык үлэлэһэллэрин бэлиэтиибит.

Уоттаах сэрииттэн тыыннаах эргиллибит, кыргыһыы толоонугар дьоруойдуу охтубут эр санаалаах буойуттар, тыылга, үлэ фронугар Кыайыы туһугар туруммут эдэр-эмэн, оҕо-дьахтар хорсун быһыылара үйэлэргэ умнуллубат. Ыччаты иитиигэ хорсун буойуттар Ийэ дойдуга тапталлара мэлдьи үтүө холобур буолар. Кинигэ «Горнай улууһа» муниципальнай оройуон баһылыга Никита Викторович Андреев, улуус баһылыгын бастакы солбуйааччыта Сардаана Степановна Стручкова көҕүлээһиннэринэн, улуус дьаһалтатын үбүлээһининэн таҕыста.

Дьоллоох, эйэлээх олох иһин турууласпыт аҕа көлүөнэ дьоммутугар куруук махтанабыт. Кинилэр үтүө холобурдарынан үлэлээн-хамсаан төрөөбүт дойдубутун сайыннарар ытык иэстээхпит! Хорсун санаалаах дьоммут Албан ааттара үйэлэргэ умнуллубатын! Киэн туттабыт! Сүгүрүйэбит! Ким да умнуллубат! Туох да умнуллубат!

Мария Павлова, бибилэтиэкэр.

Бэрдьигэстээх, Горнай.

Хаартыскалар ааптар тиксэриилэрэ