Горнайга 250 тахса мүөттээх ыҥырыа «дьиэ кэргэнэ» кэллэ

Кэнники сылларга Саха сиригэр мүөттээх ыҥырыаны иитии элбээтэ. Онуоха тыа хаһаайыстыбатын бырагыраамалара төһүү буолаллар.

Горнай улууһугар быйыл 250 тахса мүөттээх ыҥырыа «дьиэ кэргэнэ» кэллэ диэн улуустааҕы тыа хаһаайыстыбатын управлениета иһитиннэрэр. Ол курдук быйыл күһүн атырдьах, балаҕан ыйдарыгар 5 туоннаттан тахса мүөтү хомуйууга сыал-сорук турда.

Саҥа көрүҥ, хайысха сайдарыгар кыах биэрэр уонна мүөтү оҥорон таһаарыы кээмэйэ улаатарын туһугар улуустааҕы тыа хаһаайыстыбатын бырагырааматын чэрчитинэн тус сыаллаах өйөбүл баар буолла. Чуолаан, мүөттээх ыҥырыанан дьарыктанар хаһаайыстыбалар атыыласпыт ороскуоттарын 50 бырыһыанын толуйар анал субсидиянан туһаныахтара.