Горнайга баһаары утары охсуһар сулууспа спартакиадата ыытыллар

Муус устар 4 күнүттэн Горнай улууһун  Бэрдьигэстээҕэр Бүлүү бөлөх уонна Эдьигээн улуустарын баһаарынай сулууспаларын спартакиадата саҕаланна.

Күрэхтэһии үөрүүлээх аһыллыытыгар улуус баһылыгын солбуйааччы Алгыс Стручков, Бэрдьигэстээх баһылыга Алексей Аргунов эҕэрдэлээн туран үтүө суобастаах, бэриниилээх үлэлэрин иһин Евгений Бережновка «Улуус сайдыытыгар кылаатын иһин» бэлиэни, Мичил Петровка, Леонид Текеяновка Бэрдьигэстээх Бочуотунай грамотатын туттардылар.

Күрэхтэһии кылаабынай судьуйата, СӨ Баһаары утары охсуһар сулууспа начаалынньыгын солбуйааччы Анатолий Павлов, 16 №-дээх этэрээт начаалынньыга Илья Семенов быраабыланы билиһиннэрдилэр уонна ситиһиилэри баҕардылар.

Бастакы күн баһаары утары охсуһар сулууспа байыастара идэлэрин төһө бэркэ баһылыылларын көрдөрдүлэр. Иккис күн, муус устар 5 күнүгэр, күрэхтэһии Бэрдьигэстээҕи ипподромҥа салҕанар.

Вячеслав Алексеев, «Үлэ күүһэ».