Горнайга биэс саастаах оҕо тимир харчыны ыйыстыбыт

Горнай улууһугар мобильнай хируурдар биэс саастаах оҕо биэс солкуобайдаах тимир харчыны ыйыстыбытын быыһаатылар. Уол оҕо куртаҕар тимир харчылаах икки күн сылдьыбыт диэн СИА суруйар.

Оҕону Дьокуускайга санавиациянан аҕалбатахтар. Оройуон киин балыыһатыгар мобильнай хируурдары кытта үлэлии кэлбит 2-с №-дээх Өрөспүүбүлүкэтээҕи балыыһа — Суһал мэдиссиинискэй көмө киинин уопуттаах эндоскопист бырааһа Зоя Яковлева баар эбит.

«Тимир харчыны оҕо куртаҕын түгэҕиттэн буллубут. Оҕону норкуостаан баран, эндоскоп көмөтүнэн хостоотубут. Уолчаан туруга этэҥҥэ. Тимир харчы куртах сүмэһинигэр сытан хараарбыт. Эпэрээссийэҕэ олохтоох исписэлиистэр — эндоскопист быраас Егор Старостин уонна мэдиссиинискэй сиэстэрэ Наталья Стручкова кытыннылар», — диэн СИА-ҕа Зоя Яковлева кэпсээбит.