Горнайга Дмитрий Никаноров аатынан мас-рестлиҥҥэ турнир ыытыллыаҕа

Горнай улууһун Бэрдьигэстээҕэр бу сыл сэтинньи 2-3 күннэригэр тустуу тириэньэрэ, мас тардыһыы энтузиаһа Дмитрий Никаноров аатынан мас-рестлиҥҥэ өрөспүүбүлүкэтээҕи турнир ыытыллара былааннанар.

Успуорду сэҥэрээччилэр күрэхтэһиигэ тыҥааһыннаах киирсиилэр үрдүк таһымнаахтык ыыттылларын күүтэллэр. Дмитрий Никаноров мас-рестлинҥҥэ турнира «А» категориялаах, онон спортсменнарга Саха сирин успуордун маастарын нормативтарын толорор кыаҕы биэрэр. Онон бу турнирга элбэх спортсмен кыттара сабаҕаланар.

«Арассыыйа сүүмэрдэммит хамаандатын састаабыгар киирбит Саха сирин мас тардыһааччылара эмиэ киирсиэхтэрэ, ол эбэтэр хамаанда бастакы нүөмэрдэрэ. Кинилэр Кыргызстааҥҥа ыытыллар аан дойду чөмпүйэнээтигэр кыттыахтарын иннинэ бу турнирга киирсиэхтэрэ», — диэн Саха сирин сүүмэрдэммит хамаандатын сүрүн тириэньэрэ Алексей Агапов иһитиннэрдэ.

Бу күрэхтэһии үгэс быһыытынан үрдүк таһымнаах спортсменнары түмэр. Икки сыл анараа өттүгэр кыайыылаахтарынан аан дойду чөмпүйүөннэрэ Дмитрий Саввин, Семен Ануфриев, Дьулустаан Ноговицын, Европа чөмпүйэнээтин кыайыылааҕа Эрчим Баппаҕай буолбуттара.