Горнайга – дуобат успуордун дьоро күнэ

Дуобат – саха дьоно уруккуттан сөбүлүүр оонньуута. Дуобакка билигин улахан болҕомто ууруллар. Саха сирин  дуобатчыттара далааһыннаах улахан күрэстэргэ үгүс ситиһиилээхтэр. Дуобат – Саха сиригэр биир саамай сайдыбыт успуорт көрүҥэ.

Улууспутугар бэлиэ күн буолла. Улуус эдэр дуобатчыттара Арассыыйа, Европа, Аан дойду таһымнаах күрэстэргэ үгүс кыайыы көтөллөнөн кэлиилэрэ өрөспүүбүлүкэҕэ инники күөҥҥэ сылдьалларын туоһулуур. Онуоха Горнай улууһа – дуобат успуордун биһигэ диир толору бырааптаахпыт!

Саха сириттэн дуобакка Аан дойду гроссмейстера, Арассыыйа саамай эдэр чөмпүйүөнэ, сүүс харахтаах дуобакка Арассыыйа уонна Саха Өрөспүүбүлүкэтин эдэрдэргэ уонна улахан дьоҥҥо хамаандатын чилиэнэ Тунаара Федорова ситиһиитин чиэстээһин төрөөбүт улууһугар, киин бибилэтиэкэҕэ үрдүк таһымҥа буолан ааста.

Ону тэҥэ, «Родничок» оҕону сайыннарар киин уонна Оксана Касьяновна, Степан Николаевич Заровняевтар — спортивнай дьиэ кэргэн 15 сыллаах үлэлэрин уопутун түмэр «Дуобат дьикти абылаҥар» кинигэ биһирэмэ буолла. «Дуобат дьикти абылаҥар» кинигэ оскуола иннинээҕи саастаах, дуобакка саҥа саҕалааччы оҕолор иитээччилэригэр ананар.

Тунаара Федорова дуобакка сеансыгар кыралыын-улаханныын оонньоотулар. Кыайыы, тэҥнэһии, хотторуу – барыта баар. Успуорт диэн оннук, ким күүстээх бэлэмнээх, ол кыайыылаах буолар.

Успуорт бу көрүҥэ сайдыытыгар үлэлиир тириэньэрдэргэ, федерация салайааччыларыгар, уһуйааччыларга, төрөппүттэргэ, күрэхтэһиилэр спонсордарыгар, успуорт салалтатыгар барҕа махталбытын тиэрдэбит. Бу үлэ барыта биһиги кэскиллэрбит сайдыыларыгар, төрөөбүт дойдуларын таптыыр дьон буолан тахсалларыгар туһаайыллар.

Мария Павлова,
Бэрдьигэстээх, Горнай.

Ааптар хаартыскаларга түһэриитэ