Горнайга тобук сүһүөҕэр эпэрээссийэни аан бастаан оҥордулар

Бүгүн Саха сирин доруобуйатын харыстабылын устуоруйатыгар аан бастакытын Горнай улууһун оройуоннааҕы киин балыыһатыгар  тобук сүһүөҕэр эндопротезированиеҕа эпэрээссийэ оҥоһулунна.

Эпэрээссийэни травматологтар Степан Павлов уонна  Потап Потапов оҥордулар.

Горнай улууһугар тобук сүһүөҕэр өссө биир эпэрээссийэ былааннанна.

Быраастар Горнайга алтынньы 31 күнүттэн саҕалаан, сэтинньи 12 күнүгэр диэри үлэлиэхтэрэ.  Бүгүҥҥү күннээҕи туругунан, үөс тааһыгар, флебэктомияҕа, геморройидэктомияҕа 50-ча эпэрээссийэни оҥордулар. Бүгүҥҥүттэн аны гинекологтар уонна оториноларингологтар эпэрээссийэлиэхтэрэ.

Санатан эттэххэ, бу сыл тохсунньутуттан хирургия мобильнай киинин быраастара 2 тыһыынча курдук ыарыһаҕы көрдүлэр, 700-тэн тахса эпэрээссийэни оҥордулар.

“Хирургия мобильнай киинэ” инновационнай бырайыак 2024 сыл тохсунньутугар саҕаламмыта. Киин үлэлиэҕиттэн ыла оройуоннааҕы балыыһа базатыгар 1358 эпэрээссийэ оҥоһулунна, 4718 ыарыһах доруобуйатын көрдөрдө.

РБ 2 пресс-сулууспата