Горнайга «Тупсарыы» сылыгар үгүс үлэ ыытыллар

Горнай улууһугар  биллэриллибит «Тупсарыы» сылыгар  үгүс саҥа тутуу ыытыллар.

«Хаарбах дьиэттэн көһөрүү» бырагыраама чэрчитинэн эбии үс дьиэ тутуута саҕаламмыта. Ол курдук, Бэрдьигэстээххэ Софрон Данилов уулуссаҕа 42 квартиралаах, Күөрэлээххэ 18 квартиралаах, Дьиикимдэҕэ 12 квартиралаах таас дьиэ. Быйыл бу үс эбийиэк тутуллан киириэхтээх.

Санатан эттэххэ, СӨ тутуу министиэристибэтигэр улууска тутуу өттүгэр ыытыллар үлэ 2023 сыллааҕы былаанын улуус салалтата көмүскээбитэ. Ол чэрчитинэн улууска 51 квартираны, эбии 2431 кв м. хаарбах дьиэни өссө көһөрөргө ирдэммитэ.

Онон алта нэһилиэккэ  быйыл бу бырагыраама чэрчитинэн  олохтоохтор саҥа дьиэлэргэ көһүөхтэрэ.  Бу үлэлэр быйылгыттан ыытыллан, 2024 сылга үлэҕэ киириэхтээхтэр. Маны тэҥэ Атамайга  12 квартиралаах дьиэ тутуллуохтаах.

Горнай улууһун дьаһалтата