Горнайга «вируһу ыспыттара» оруннаах дуо?

Социальнай ситимнэргэ Горнай улууһугар Маҕарас сэлиэнньэтин аттыгар сөмөлүөт төгүрүччү көтө сылдьан, суол хаалларбыт видеота тарҕанна. Видеону устубут киһи “бу сөмөлүөт вируһу ыһан, тарҕата сылдьар” диэн этэр. Бу төһө оруннааҕый?

СӨ тырааныспарга, суол хаһаайыстыбатыгар министиэристибэтэ иһитиннэрбитинэн, бу сөмөлүөт инверсионнай (конденсатнай) суола эбит. Судургутук быһаардахха, сөмөлүөт двигателиттэн тахсар итии паар тымныы салгыҥҥа тахсаат, муус кыырпахтарыгар кубулуйар, онто үрүҥ өҥнөөх хойуу буруо курдук көстөр. Тыал, салгын хамсыырыттан тутулуктанан, бу суол халлааҥҥа хас да чаас туран хаалыан сөп.

Министиэристибэҕэ быһаарбыттарынан, сөмөлүөт Дьокуускайга П.А. Ойуунускай аатынан аэропорка, эбэтэр Маҕан аэропордугар түһэрин кэтэһэ сылдьан, биир сиргэ төгүрүччү эргийбит буолуон сөп. Санатар буоллахха, Маҕарас Дьокуускайтан 10 көстөөх сиргэ турар. Халлаантан көрдөххө, бу бачча арыттаах сир чугас буолуон сөп.