Горнайга үрдүк бэлэмнээх буолуу эрэсиимэ ылылынна

Горнай улууһугар Хаар Балаҕан, Дьүктүөнэ уонна Чакыйа үрэхтэр ууларын таһыма үрдээн, үс сэлиэнньэ ууга барар куттала үөскээтэ. Оройуоҥҥа үрдүк бэлэмнээх буолуу эрэсиимэ ылылынна.

Ол курдук, Өрт сэлиэньэтигэр барыта 11 олорор дьиэ, хочуолунай уонна спортивнай саала ууга барар кутталлаахтар. Бэс Күөлгэ — 18 олорор дьиэ, оскуола, бибилитиэкэ, түмэл уонна почта дьиэтэ. Маҕараска — 9 дьиэ уонна РЭС ыстаансыйата.

Ону тэҥэ Бэрдьигэстээххэ Матта өрүс уутун таһыма үрдээтэҕинэ олорор дьиэлэр уонна социальнай эбийиэктэр ууга барыахтарын сөп.

Билиҥҥи туругунан, нэһилиэктэргэ ууга барбыт эбийиэктэр суохтар. Өрткө спортивнай саала тиэргэнигэр уу кыратык киирбит. Уу таһыма кутталлаах бэлиэтээһинтэн намыһах.

Бары сэлиэнньэлэргэ суукканы эргиччи дьуһуурустуба үлэлиир. Быстах кэмҥэ олорор пууннар тэрилиннилэр. Дьиэлэрэ ууга барыан сөптөөх ыаллар бэлэмнэр.