«Горнайым инникитэ» — улуус ыччатын дьылабыай оонньуута

Атамайга «Горнайым инникитэ» улуус ыччатын дьыалабыай оонньуута үрдүк таһымнаахтык ыытылынна.

Ол курдук, Атамайга улууспут бары нэһилиэктэрин ыччаттара тэринэн, ох курдук оҥостон, үчүгэйдик бэлэмнэнэн улууспут сайдарыгар бэйэлэрин этиилэрин туруорса муһуннулар. Тэрээһин улуус дьаһалтатын өйөбүлүн ылбыт грантовай бырайыак чэрчитинэн ыытылынна.

Бу бырайыак сүрүн оҥкулунан «Атамайым инникитэ» диэн Бэс Күөлүгэр үтүө үгэскэ кубулуйбут оонньуу быраабылата буолла. 2008 сылтан ыытыллар оонньуу Бэс Күөлүн ыччаттарын түмэ тардан, социальнай бырайыактааһыҥҥа үөрэтэр. Маннык үтүө хамсааһыны нэһилиэккэ саҕалаабыт дьоннорунан Роман Федоров уонна Ксения Васильева буолаллар. Бу хамсааһыны ыччат сөбүлээн, күн бүгүнүгэр диэри сыллата ыыталлар. Хамсааһын үтүөтэ биһиги нэһилиэкпитигэр улахан төрүөт биэрбитэ: ыччаттарбыт араас таһымнаах грантовай күрэстэргэ кыайан саҕалаабыттара, бөһүөлэкпитигэр дьылабыай оонньууга кыайбыт бырайыактар олоххо киирэн барбыттара. Ол курдук киирэ түһүүгэ «Бэс Күөлэ» сурук турбута, Кыайыы болуоссата саҥардыллыбыта, оҕо оонньуур былаһааккалара тутуллубуттура, икки бэкээринэ үлэлээн саҕалаабыта.

Быйылгы улуус таһымнаах дьыалабыай оонньуу Бэс Күөлүгэр иккиһин үрдүк таһымнаахтык тэрилиннэ. Кыттааччылар сэрэбиэй быһыытынан тоҕус хамаандаҕа тыырылыннылар. Хамаандалар тоҕус нэһилиэк аатын ыланнар, талыллыбыт нэһилиэктэрин инники сайдыытыгар аналлаах бырайыактарын күн устата бэлэмнээтилэр, чочуйдулар.

Дьылабыай оонньуу кыттыылаахтарыгар, ыҥырыылаах ыалдьыппыт Анна Фомина сөпкө саҥарарга, тыл күүһүн, информацияны сөптөөхтүк тиэрдэргэ «Повелитель слов» диэн маастар-кылааһы ыытта. Эстрада ырыаһыта Эрхаан Попов эҕэрдэ ырыаларынан тэрээһини киэргэттэ.

Тоҕус хамаанда көмүскээбит бырайыактарын эспиэрдэр сыаналаатылар. Хас биирдии бырайыак олоххо киирэригэр үлэ ыытылларын бэлиэтээтилэр. Бу күн эспиэр быһыытынан үлэлээтилэр нэһилиэк баһылыктара, нэһилиэктэр баһылыктарын солбуйааччылара, улуус дьаһалтатын отделларын начаалынньыктара.

Күрэхтэһии түмүгүнэн кыайыылаах «Одуну» холбоһуктаах хамаанда бырайыага — «Лосиный путь» таҕыста, «Самый инновационный проект» анал аатынан «Солоҕон» хамаандатын «Молодежное пространство «Дьулуур» бырайыага ааттанна. «Лучший спикер» анал ааты ылары ситистилэр: Куудук Аман, Новикова Вилена, Максимова Мария.

Ити курдук улууспут ыччаттара түмсэн, биир санаанан улууспут сайдыытын түстүүр бырайыактары суруйан, бэйэ-бэйэлэрин кытары билсэн, үөрэнэн, дуоһуйа сынньанан, үөрэн-көтөн тарҕастылар.

Айсен Павлов,

Атамай нэһилиэгин баһылыга, Горнай.

Хаартыскалар Айсен Павлов тиксэриилэрэ