Госавтоиниспиэксийэ үлэһиттэрэ  суһал көмө суоппарыгар көмөлөстүлэр

Госавтоиниспиэксийэ үлэһиттэрэ  тоһуттар тымныыга массыыната алдьаммыт суһал көмө суоппарыгар көмөлөстүлэр. Бу туһунан Ис дьыала министиэристибэтин пресс-сулууспата суруйар.

Тохсунньу 3 күнүгэр Мэҥэ Хаҥаластааҕы  ДПС отделын иниспиэктэрдэрэ — полиция  лейтенаннара  Семен Петухов уонна  Роберт Егоров «Лена» федеральнай суолга куттал суох буолуутун хааччыйыыга дьуһуурустубаҕа сылдьыбыттар. Патруллааһын кэмигэр  1156 км, Аллараа Бэстээх кытыытыгар, аварийнай сигналын холбоон турар массыынаны бэлиэтии көрбүттэр.

Онно тохтоон суоппары кытта кэпсэтэн билбиттэрэ, суоппар Павловскайтан төттөрү кэлэн иһэн тымныыга массыынатын көлүөһэтэ  тэстибит эбит. Суоппар иниспиэктэрдэртэн мэдиссиинэ тэрилтэтин гарааһыттан саппаас көлүөһэ аҕалалларыгар көрдөспүт.
Госавтоиниспиэксийэ үлэһиттэрэ саппаас көлүөһэ аҕалан, суоппарга уларытарга көмөлөспүттэр.

Бу күннэргэ Саха сиригэр тымныы күннэр тураллар. Госавтоиниспиэксийэ үлэһиттэрэ күннэтэ өрөспүүбүлүкэ суолларынан сылдьан, дьуһуурустубаҕа тахсаллар, ыарахан балаһыанньаҕа түбэспит суоппардарга көмөлөһөллөр.