Госавтоинспекция улахан дьону массыыналарын күлүүһүн дьон көрөр сиригэр хаалларбаттарыгар уонна оҕолор иллэҥ кэмнэрин хонтуруоллуулларыгар ыҥырар

Тохсунньу саҕаланыаҕыттан Дьокуускайга саастарын ситэ илик оҕолор уруулга олорон, иккитэ массыына саахалланыытын таһаардылар.

Тохсунньу 8 күнүгэр түүн 3:00 чаас саҕана суолга куттал суох буолуутун судаарыстыбаннай инспекциятын дьуһуурунай бөлөҕөр 17 саастаах уол “Тойота Карина” массыынаны ыыта сылдьан, гаастыыр педалы туормас педалын кытта бутуйан, кэннинэн тиийэн “Тойота Премио” массыынаны  охсубутун туһунан иһитиннэрии киирбит. Уол быһылаантан эмсэҕэлээбэтэх, массыына киниэнэ буолбатах эбит. Сокуоннай сааһын туола илик оҕоҕо РФ КоАП 12.7 ыстатыйатын 1 чааһынан административнай матырыйаал тэрилиннэ.

Тохсунньу 18 күнүгэр киэһэ 20 чаас саҕана Киров уулуссатын 9 №-дээх дьиэтин таһыгар 16 саастаах уол «Subaru Forester» массыынаны ыыта сылдьан, светофор тохтотор уотун аахайбакка аһара баран атын массыынаны кытта харсыспыт. Саахалга ким да эмсэҕэлээбэтэх, ол гынан баран материальнай хоромньу оҥоһуллубут. Ону тэҥэ уолга РФ КоАП 12.12 ыст. 1 чааһынан уонна 12.7 ыст. 1 чааһынан административнай матырыйаал оҥоһулунна.

РФ КоАП 12.7 ыстатыйатыгар этиллэринэн, бу буруйу оҥорууга 5000-тан 15000 солкуобайга диэри ыстараап көрүллэр. Ону таһынан массыына хаһаайыныгар массыынаны ыытар бырааба суох киһиэхэ ыытарыгар көҥүл биэрбитин иһин административнай матырыйаал эмиэ оҥоһуллар, ол 30 000 солкуобай ыстарааптаах. Онон массыына күлүүһүн оҕо ылар сиригэр хаалларымаҥ, диэн киин куорат госавтоинспекциятын телеграм-ханаала иһитиннэрэр.