Госдуумаҕа оҕо күүтэр устудьуоннарга бэриллэр босуобуйа кээмэйин туһунан эттилэр

Оҕо күүтэр устудьуоннарга бэриллэр босуобуйа кээмэйэ кыыс үөрэнэр кыһата ханнык эрэгийиэҥҥэ баарыттан, онно тиийинэн олоруу алын кээмэйиттэн тутулуктаах буолуоҕа диэн РИА-Сонуннарга Госдуума дьиэ кэргэн көмүскэлигэр кэмитиэтин бэрэссэдээтэлин бастакы солбуйааччы Татьяна Буцкая эттэ.

Арассыыйа бэрэсидьиэнэ Владимир Путин от ыйын 23 күнүгэр сокуоҥҥа илии баттаата, ол быһыытынан Арассыыйаҕа оҕо күүтэр устудьуоҥкаларга бэриллэр босуобуйа балаҕан ыйын 1 күнүттэн эрэгийиэннээҕи тиийинэн олоруу алын кээмэйигэр диэри үрдүөҕэ, бу устудьуон  истипиэндийэны ыларыттан-ылбатыттан тутулуга суох. Босуобуйа ортотунан 90 202 солкуобай буолара олохтоммут.

Буцкая этэринэн, бу биирдэ бэриллэр босуобуйа оҕо төрөөбүтүн кэннэ төлөнүөҕэ.

«Оҕо босуобуйатын ийэ да, аҕа да, үлэлиир эбээ, эһээ да ылыахтарын сөп, оттон хат буолуу, төрөөһүн босуобуйатын оҕону төрөппүт устудьуон бэйэтэ эрэ ылыан сөп», — диэн чопчулаата. Парламентарий босуобуйаны ыларга сааһынан хааччахтааһын суох диэн эбэн эттэ. Кини этэринэн, сүрүнэ – кыыс идэлээх үөрэх тэрилтэтигэр, үрдүк үөрэх тэрилтэтигэр, эбии идэлээх үөрэхтээһин үөрэҕин тэрилтэтигэр эбэтэр билим тэрилтэҕэ үөрэнэр күнүскү үөрэх устудьуона буолуохтаах.