Госдуума дьокутаата «Бөҕө тирэхтээх дьиэ кэргэн» бырайыак актыыбын кытары көрүстэ

Бу күннэргэ Госдуума дьиэ кэргэн уонна оҕо боппуруостарыгар кэмитиэтин бэрэссэдээтэлин солбуйааччы Татьяна Буцкая Саха сиригэр кэлэн үлэлии сылдьар. Бу сырыыга дьокутаат «Биир ньыгыл Арассыыйа» «Бөҕө тирэхтээх дьиэ кэргэн» баартыйа бырайыагын эрэгийиэннээҕи актыыбын кытары көрүстэ.

Көрсүһүү «Биир ньыгыл Арассыыйа» баартыйа эрэгийиэннээҕи исполкомугар ыытылынна.

«Саха сиригэр оҕолоох дьиэ кэргэни өйүүр дьаһаллар олоххо киирэн тураллар: ол үһүс оҕо төрөөтөҕүнэ бэриллэр ийэ хапытаала уонна үстэн элбэх оҕолоох дьиэ кэргэни өйөөһүн, биэс сылга диэри уһатыллыбыт «Сүүс сыл оҕолоро» тус сыаллаах хапытаал», — диэн эттэ «Бөҕө тирэхтээх дьиэ кэргэн» бырайыак Саха сиринээҕи куратора Алена Атласова.