Госдуумаҕа 13-с биэнсийэни аныыр туһунан сокуон барылын көрүөхтэрэ

Госдууума дьокутааттара страховой биэнсийэҕэ сыл аайы эбии төлөбүрү олохтуур туһунан этии киллэрдилэр. Уларытыылары «Страховой биэнсийэлэр тустарынан» 2013 сыл ахсынньы 28 күнүнээҕи № 400-ФЗ федеральнай сокуоҥҥа киллэрэр былааннаахтар.

Саҥа уларыйыынан төлөбүр кээмэйин гражданин ыла сылдьар страховой биэнсийэтин саҕа гына быһаарыахтара, ол эрээри суумата бүтүн Арассыыйа үрдүнэн биэнсийэлээх киһи тиийинэн олоруу алын кээмэйиттэн 1,5 төгүл кыра буолуо суохтаах. Холобур, 2025 сылга бу 22 875 солкуобай кэриҥэ буолуо этэ. 13-с биэнсийэ алын кээмэйин быһаарыы социальнай нуормаларга эппиэттиир. Ол курдук, мантан ордук үп-харчы өттүнэн көмүскэлэ суох, саамай намыһах биэнсийэлээх дьон дохуоттарыгар ордук улахан эбии харчыны ылыахтара. Эбии төлөбүрү автоматическайдык, ханнык да сайабылыанньата суох оҥорорго этии киирдэ.

Сокуон барылын ааптардара этэллэринэн, дьаһал биэнсийэлээхтэри өйүүр эбии мэхэньииһиминэн буолуо, инфляция уонна табаар сыаната үрдээһинэ нэһилиэнньэ саамай көмүскэлэ суох араҥатын олоҕун хаачыстыбатыгар куһаҕаннык дьайарын мөлтөтүө, ону тэҥэ аҕам саастаах дьон олоҕун таһымын уонна социальнай көмүскэллээх буолууларын үрдэтиэ.

Сокуон барылын оҥорооччулар бэлиэтииллэринэн, бүгүҥҥү күҥҥэ  страховой биэнсийэ орто кээмэйэ 23-24 тыһ. солкуобайга тэҥнэһэр, бу тиийинэн олоруу алын кээмэйиттэн арыый эрэ үрдүк. Бастакы наадалаах табаардарга, эмп-томп сыанатыгар уонна дьиэ-уот, хомунаалынай өҥөлөр иэстэригэр сыана үрдүүрүн кэннэ, маннык кыһалҕа ордук сытыырхайар. Биэнсийэни сыл аайы индексациялыыр билигин үлэлиир мэхэньииһими туһаныы табаардар сыанатын үрдээһинин толору толуйбат уонна ситэтэ суох. Саҥа дьыл иннинэ бэриллэр төлөбүр аҕам саастаах дьоҥҥо кыһыҥҥы кэмҥэ бэлэмнэнэллэригэр, иэстэрин-күүстэрин сабалларыгар, эмп-томп атыылаһалларыгар көмөлөһүө диэн сокуон барылын ааптардара бэлиэтииллэр