Госдуумаҕа алкомаркет ахсаанын аҕыйатарга туруорсаллар

Арассыыйаҕа арыгыны эргинии уонна атыылааһын олус судургутуйда. Алкомаркет ахсаана биллэрдик күн ахсын эбиллэ турар.

Маны сэргэ арыгы маҕаһыыннарын үгүстэрэ элбэх мэндиэмэннээх олорор дьиэлэр бастакы этээстэригэр арыллан үлэлииллэр. Госдуумаҕа бу сыалга нэһилиэнньэ  ахсааныттан  көрөн уонна суоттаан, арыгы атыылыыр маҕаһыыннар ахсаанын аҕыйатары үөрэтэллэр. Ону сэргэ дьокутааттар арыгы бары көрүҥүн онлайн ньыманан эргинэри акаастанарга туруорсаллар.

«Нэһилиэнньэҕэ алкомаркет маҕаһыыннарын ахсаана элбэҕэ олус долгутар. Маннык атыы-эргиэн туочукаларын ахсаанын хайаатар да аҕыйатыахха наада! Сокуонунан хааччахтанан, ахсаана лаппа аҕыйыахтаах уонна хонтуруолланыахтаах дии саныыбын», – диир Госдуума дьокутаата Бийсултан Хамзаев. Бу туһунан «Парламентская газета» иһитиннэрэр.

«Бастатан туран, нэһилиэнньэттэн этиилэри хомуйуохпут, оттон сокуон барылын оҥоруохпут, ол кэннэ салгыы туһааннаах министэристибэлэринэн ыытыахпыт. Санаттахха, арыгыны утары охсуһууга бастакы хардыы оҥоһуллубута. Эрэгийиэннэринэн арыгы атыылыыр болдьоҕун хааччахтыырга уонна  «наливайкалары» хонтуруоллуурга сөптөөх боломуочуйалары туттарбыппыт. Мантан салгыы алкомаркет ахсаанын учуоттуохха уонна хонтуруоллуохха наада»,  — диэн эбэн эттэ Госдуума дьокутаата.

«Билигин сорох эрэгийиэннэринэн «Чөл олохтоох нэһилиэк»  хамсааһын олоххо киирэн үлэлиир. Ол курдук, олохтоохтор нэһилиэк мунньаҕын тэрийэллэр уонна муниципальнай тэриллии сиригэр  арыгыны атыылааһыны тохтоторго быһаарыы ылыналлар. Ол эрээри, сокуонунан итинник нэһилиэктэргэ алкомаркет маҕаһыына арыллар кыаҕа эмиэ баар. Судаарыстыба нуормалара итиннэ мэһэйдээбэт. Бу сыыһа! Судаарыстыба маннык көҕүлээһиннэри хайаатар да өйүөхтээх уонна көмөлөһүөхтээх! Холобур, арыгыны утары охсуһууга улахан үлэ Башкирияҕа уонна Удмуртияҕа ыытыллар. Номнуо билигин үчүгэйдик Татарстааҥҥа олоххо киирэн үлэлээбитэ уонна Ульяновскай уобаласка саҕалаан эрэллэр. Оттон Саха сиригэр бу быраактыка көдьүүстээхтик үлэлиир, итини сэргэ Кавказка  чөл олохтоох элбэх нэһилиэктэр бааллар. Ол гынан баран, манна бэлиэтиир наадалаах,  бу салалта ыытар үлэтэ буолбатах, нэһилиэнньэ бэйэтэ көҕүлүүр», — диир Бийсултан Хамзаев.

Бэлиэтээн эттэххэ, «Чөл туруктаах нэһилиэк» хамсааһын Саха сиригэр сылтан сыл кэҥээн иһэр. Олохтоох дьаһалта сокуонунан нэһилиэккэ арыгы атыытыттан толору босхоломмут сиринэн биллэрэр бырааптаах. Билигин Саха сирин үрдүнэн арыгыттан аккаастаммыт барыта 2000-тан тахса нэһилиэк баар.