Госдуумаҕа байыаннай комиссариат ыстараабын улаатыннарар туһунан сокуон барыла көрүллүөҕэ

Аныгыс нэдиэлэҕэ Госдуумаҕа байыаннай комиссариакка үс ыйтан ордук регистрацията суох атын сиргэ көспүт гражданнарга административнай эппиэтинэһи кытаатыннарарга сокуон барыла киллэриллиэҕэ.

Ол туһунан суруналыыстарга сокуон ааптара, көҕүлээччитэ, Госдуумаҕа оборуонаҕа кэмитиэтин салайааччыта Андрей Картаполов иһитиннэрдэ.

Кини этэринэн, ыстараап суумата ботуччу буолуоҕа. Бу иннинэ дойду Бырабыыталыстыбата сокуон барылын өйүүрүн биллэрбитэ. Уларыйыылары РФ Административнай Кодексатыгар киллэрэргэ былааннанар. Билигин сокуон ирдэбилинэн гражданнар ыал буолууларын, үөрэхтэрин, үлэ миэстэтин, ону тэҥэ олорор сиринэн саҥа регистрациятын, атын сиргэ көспүтүн,  алта ыйтан ордук атын дойдуга тахсыбытын туһунан байыаннай комиссариаты эбэтэр олохтоох дьаһалтаны биллэриэхтээх.

Билигин биллэрбэтэх түгэнигэр 1000 солкуобайтан 5000 солкуобайга диэри ыстараап көрүллэр. Саҥа сокуон барыла биирдиилээн гражданнарга административнай эппиэтинэстэрин күүһүрдэр, ол эрээри бырабыыталыстыба чопчу ыстараап кээмэйин быһаара илик.