Госдуумаҕа байыастар дьиэ кэргэттэригэр оруна суох бэлэхтэри оҥорууну кириитикэлээтилэр

Госдуумаҕа эрэгийиэн салайааччылара анал байыаннай дьайыы кыттыылаахтарын дьиэ кэргэттэригэр оруна суох бэлэхтэри түҥэтиилэрин бюрократия, болҕомтото суох буолуу түмүгүнэн ааҕылынна. Бу туһунан Госдуумаҕа Оборуона кэмитиэтин бэрэссэдээтэлин бастакы солбуйааччыта Алексей Журавлев иһитиннэрдэ.

«Бу киһиэхэ сыһыаннаан «силлээһин» кэриэтэ. Сайалайааччыларга байыастар дьиэ кэргэттэрин дьиҥнээх кыһалҕаларыгар уонна түбүктэригэр ымпыктаан-чымпыктаан көмө оҥорордооҕор, «бэлэх туттардыбыт» диэн отчуоттуур быдан чэпчэки. Биһиги бу сыһыаны уларытыах тустаахпыт. Туһата суох микроволновкалары түҥэтэргитин тохтотун!» — диэн парламентарий бэлиэтээтэ.

Бу туһунан Regnum.ru иһитиннэрэр. Дьокутаат дьону кытта кэпсэтэргэ уонна кинилэр туохха наадыйалларын истэргэ ыҥырда. Кини этэринэн, көмө оҥоруу аадырыстаах буолуохтаах. Сорох дьиэ кэргэҥҥэ ас-үөл, атыттарга — таҥас-сап, оттон үһүстэргэ — эмп-том наада. Арассыыйа буойуннарын хорсун быһыыларын ытыктыахха наада, диэн кини түмүктээтэ.

Санатан эттэххэ, муус устар 28 күнүгэр Арассыыйа Бэрэсидьиэнэ Владимир Путин эрэгийиэннэр бастыҥ уопуттарын туһанан, байыаннай дьайыы байыастарын өйүүр биир кэлим стандаартары оҥорон таһаарарга сорудахтаабыта. Ону таһынан, судаарыстыба баһылыга парламентарийдарга, РФ Бырабыыталыстыбатыгар уонна «Аҕа дойду көмүскээччилэрэ» пуондаҕа анал байыаннай дьайыы байыастарын уонна кинилэр дьиэ кэргэттэрин социальнай көмүскэллэрин кэҥэтэр үлэни тохтоло суох ыытарга сорудахтаабыта.