Госдуумаҕа баттах кырааскатын бэрэбиэркэлииргэ ыҥырдылар

Госдуума дьокутаата Сергей Леонов Роспотребнадзорга Schwarzkopf уонна Syoss баттах кырааскалары бэрэбиэркэлииригэр көрдөстө.

Докумуоҥҥа бу немец фирмаларын бородууксуйаларыгар бутилфенилметилпропионаля (лилий альдегид) эттик булуллубутун туһунан иһитиннэрии СМИ-гэ тарҕаммыта бэлиэтэнэр. Булуллубут эттик репродукционнай функцияны кэһиигэ, ону тэҥэ дерматикка тиэрдиэн сөп.

«Ытыктабыллаах Анна Юрьевна, үөһэ ыйыллыбыт парфюмернай-косметическай бородууксуйа киһи доруобуйатыгар охсуутун бэрэбиэркэлииргэ уонна Роспотребнадзор управлениеларыгар атыыланар туочукаларынан ис туругун көрөргө көрдөһөбүн», — диэн этиитигэр суруйда.

Онуоха дьокутаат өссө бэлиэтииринэн, киһи доруобуйатыгар охсуулаах лилий альдегид  эттиги Арассыыйаҕа оҥоһуллар сорох косметика табаардарыгар кытта булуохха сөп.