Госдуумаҕа биэнсийэҕэ эбии төлөбүрү 70 саастан аныырга этии киллэрдилэр

Госдуумаҕа Үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов биэнсийэҕэ эбии төлөбүрү билиҥҥи курдук 80 саастан буолбакка, 70 саастан аныырга этии киллэрдэ.

Сокуон барылын парламентарий РФ Бырабыыталыстыбатыгар көрүү ыыппытын туһунан дьокутаат пресс-сулууспата иһитиннэрдэ. Көҕүлээһининэн, кырдьаҕас сааһынан страховой биэнсийэҕэ бигэргэтиллибит төлөбүр улаатыыта саастарыттан тутулуктанан араарыллан олохтонуо: 70 саастарын туолбуттарга — 100 бырыһыанынан, 80 саастарын туолбуттарга эбэтэр I группалаах инбэлииттэргэ — 200 бырыһыанынан, оттон 90 саастарын туолбуттарга — 300 бырыһыанынан. Ону таһынан, I группалаах инбэлииттэринэн билиниллибит Арассыыйа олохтоохторугар инбэлииттэр страховой биэнсийэлэригэр олохтоммут төлөбүрү 200 бырыһыаҥҥа тэҥнээх сууманан улаатыннарарга этиллэр.

Сокуон барылын ааптара быһаарбытынан, бу этиини Луганскайтан сылдьар биэнсийэлээх этэн аһарбыт. Нилов этэринэн, быйыл тохсунньу 1 күнүттэн бигэргэтиллибит төлөбүр кээмэйэ 8907,7 солк. тэҥнэстэ. Онуоха, дьокутаата ааҕарынан, кырдьаҕас сааһынан страховой биэнсийэҕэ үрдэтиллибит төлөбүрү ылар быраабы биэрэр 80 саас, ону таһынан эбии төлөбүр кээмэйэ «аҕа саастаах гражданнар үгүс өттүлэригэр бу быраабы туһаналларыгар кыах биэрбэт».

Парламентарий бэлиэтээбитинэн, Арассыыйаҕа 80 саастарыгар диэри эр дьон 24,6%-на уонна дьахталлар 54%-нара тиийэллэр, оттон 90 саастарыгар диэри эр дьон баара-суоҕа 16%-на уонна дьахталлар 34% кэриҥнэрэ эрэ олороллор.