Госдуумаҕа дьиэтэ суох кыыллары аһатыыны бобору дьүүллэһиэхтэрэ

Арассыыйа олохтоохторо бэйдиэ сылдьар ыттары, куоскалары аһаталлара бобуллаары турар. Госдума оробуочай бөлөҕө хас да көҕүлээһиҥҥэ көннөрүүлэри бэлэмнии сылдьар, олортон саамай мөккүөрдээхтэрэ бэйдиэ сылдьар ыты, куосканы аһатыахха дуу, суох дуу диэн ыйытыы буолбут, диэн иһитиннэрэр “Российскай газета”.

Сорохтор маны гуманнайа суох быһыынан ааҕаллар.

“Бобор оннугар волонтердар дуу, ыты тутар сулууспалар дуу хонтуруолларынан ыттар анал аһыыр сирдэрин тэрийбит ордуга дуу”, — диир дьокутаат Николай Будуев.

Саҥа бобууну таһынан, Арассыыйа олохтоохторо дьиэ кыылын сүтэрдэхтэринэ уонна үс күн иһигэр былаас уорганнарыгар биллэрбэтэхтэринэ накаастаныахтара. Маннык түгэҥҥэ, харамай соруйан быраҕыллыбыт уонна дьиэтэ-уота суох хаалбыт кыылынан ааҕыллыаҕа. Дьиэ кыылларын тутар сиргэ  олорор болдьохторо бүттэ да, дьоҥҥо уонна баайга-дуолга кутталы үөскэтэрин быһыытынан утутуллуохтара.

“Утутар миэрэни туһаныы ханнык түгэҥҥэ туттуллуохтааҕын чуолкайдыахха наада. “Кутталы үөскэтэр” диэн чуолкайа суох этии, итинэн туһанан аһары туттуу барыаҕа”, – диир.

Бэйдиэ сылдьар ыттардаах нэһилиэнньэлээх пууннар баһылыктарыгар көрүллэр ыстарааптар эмиэ чуолкайдааһыны эрэйэллэр.

“Юридическай сирэй эппиэтинэһэ хайдах буолара, кыһалҕаны быһаарарга ханнык миэрэлэр ылыллыахтаахтарын эмиэ быһаарар наада”, — диэтэ Будуев.

Кини этэринэн, көннөрүүлэр уопсастыбаннас, эспиэрдэр, кыыллары көмүскэһэр тэрилтэлэр, санааларын учуоттаан ситэри оҥоһуллуохтарын наада.

“Дьоҥҥо куттала суох буолууну уонна кыылга гуманнай сыһыаннаһыы ыккардыгар тэҥ көрүү наада. Бэйдиэ сылдьар ыттар – бу кэлим кыһалҕа, онон тутарынан, хаайарынан эрэ муҥурдаммакка, хаһаайыттар эппиэтинэстэринэн, стерилизациянан, нэһилиэнньэни сырдатар үлэнэн олохтоохтук дьарыктаныахха наада”, — диэн түмүктээтэ дьокутаат.