Госдуумаҕа элбэх этээстээх дьиэ аттыгар фейерверк ытыыны боборго этии киллэрдилэр

Саҥа дьылга фейерверктартан олох аккаастанар сатаммат, ол эрээри элбэх кыбартыыралаах  дьиэлэр тастарыгар ытыыны чопчу бобуохха наада. Бу туһунан ТАСС-ка Госдуумаҕа Дьиэ кэргэн, аҕа, ийэ буолуу уонна оҕо саас боппуруостарыгар кэмитиэтин бэрэссэдээтэлин солбуйааччы Виталий Милонов («Биир ньыгыл Арассыыйа») иһитиннэрдэ.

«Куораттар кииннэригэр фейерверк ытыыны букатын бобор сатаммата өйдөнөр. Элбэх этээстээх дьиэлэр турар, фейерверк балконҥа түһүөн сөптөөх сирдэригэр ытыыны бобуохха наада. Ол эрээри, уопсайынан бобор, мин санаабынан, аһара кытаанах соҕус буолуо», — диэн дьокутаат эттэ. Кини этэринэн, билиҥҥи сорох хааччахтааһыннар  дьоҥҥо-сэргэҕэ өйдөммөттөр. «Быраабылалар олус өйдөнүмтүө буолуохтаахтар. Тиэргэҥҥэ, аһаҕас былаһааккаҕа, дьиэттэн 50–100 м чугаһа суох сиргэ ытыыны чопчу суруйуохха наада», — диэн парламентарий эттэ уонна сокуону тутуһар дьон ити хааччахтары тутуһуохтара диэн эрэнэрин биллэрдэ. Милонов бэлиэтээбитинэн, сөпкө туһаныллар уонна контрафактнайа суох пиротехника үөрүүнү эрэ аҕалыан сөп.

«Официальнай маҕаһыынтан бэрэбиэркэлэммит пиротехниканы атыылаһан, бигэргэтиллибит миэстэҕэ салюту ытыы кимиэхэ да куһаҕаны оҥорбот», — диэн Милонов эттэ.