Госдуумаҕа хамнаһы сыл аайы индексациялыыры сокуонунан бигэргэтэргэ этии киллэрдилэр

Дойду үрдүнэн хамнаһы сыл аайы индексациялааһын бары эйгэни хабыахтаах, онно сөптөөх мэхэньииһим РФ Үлэ кодексатыгар суруллуон сөп. Бу туһунан ТАСС интервьютугар Госдуума Үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов эттэ.

«Инфляция буоларын быһыытынан, үлэһит хамнаһа сыл аайы үрдүөхтээх, ханна, ханнык эйгэҕэ үлэлиириттэн тутулуга суох. Ханнык баҕарар түгэҥҥэ хамнас үрдээһинэ кырата дьиҥнээх инфляция таһымыгар хааччыллыахтаах», – диэн Нилов эттэ.

«Мин билигин юристары кытта Үлэ кодексатын хамнаһы үрдэтии туһунан этиллэр ыстатыйатыгар хас биирдии үлэһит хамнаһа дьиҥнээхтик үрдүүрүн хааччыйар эбии уларыйар-тэлэрийэр мэхэньииһимнэри хайдах сөпкө киллэрэр туһунан толкуйдуу сылдьабын», – диэн дьокутаат эбэн эттэ.

Нилов эппитинэн, «Үлэ кодексатыгар үлэ биэрээччи хамнас сыл аайы үрдүүрүн хааччыйыахтаах диэн нуорма сурулла сылдьар». «Ол эрээри, олоххо-дьаһахха уонна баар суут быһаарыыларыгар, ол иһигэр РФ Конституционнай суутун быһаарыытыгар олоҕуран, бу индексация нөҥүө эрэ буолбакка, бириэмийэлээһин нөҥүө эмиэ оҥоһуллуон сөп», – диэн дьокутаат эттэ.

Билигин РФ Үлэ кодексатыгар хамнаһы индексациялааһын туһунан 134-с ыстатыйа баар, ол эрээри төһө кэм устата ыытыллара уонна атын көрдөрүүлэр ыйыллыбатахтар. Ыстатыйа тиэксигэр этиллэринэн, судаарыстыбаннай уорганнар, олохтоох салайыныы уорганнара, судаарыстыбаннай уонна муниципальнай тэрилтэлэр индексацияны үлэ сокуонугар уонна үлэ быраабын нуормаларыгар олохтоммут бэрээдэгинэн ыытыахтаахтар, «оттон атын үлэ биэрээччилэр – кэлэктиибинэй дуогабарынан, сөбүлэһиилэринэн, тэрилтэ иһинэн нуормалыыр аахталарынан олохтоммут бэрээдэгинэн». Олоххо-дьаһахха бүддьүөт үлэһиттэрин уонна судаарыстыбаннай сулууспалаахтар хамнастара сыл аайы федеральнай нуормаларга сөп түбэһиннэрэн индексацияланар, оттон атын эйгэлэргэ үлэ биэрээччилэр бэйэлэрэ быһаараллар.