Госдуумаҕа кыһыҥҥы кэмҥэ үлэ кыраапыгын уларытарга этии көтөхтүлэр

Сорох эрэгийиэннэр кыһыҥҥы кэмҥэ, хойут сырдыыр уонна эрдэ хараҥарар кэмигэр, үлэ күнэ саҕаланар кэмин уларытар кыахтаах буолуохтаахтар. Бу туһунан ТАСС-ка биэрбит интервьютугар Госдуума вице-спикерэ Владислав Даванков  эттэ.

Кини бэлиэтээбитинэн, билигин үгүс үлэһиттэр күн сырдыгын  көрбөккө кэриэтэ, бүтүннүү үлэҕэ эбэтэр үөрэххэ атаараллар. «Уһук Илиҥҥэ, Хоту, Москваҕа уонна Санкт-Петербурга үлэ саҕаланар кэмин биир чаас сыҕарытыахха сөп этэ — күн сырдыгын көрөр туһуттан. Үгүстүк үлэҕэ, оттон оҕолор оскуолаҕа — хараҥаҕа бараллар, хараҥаҕа төннөллөр. Онон үлэ чааһын 30 мүнүүтэ сыҕарытыахха сөп, уонна бу быһаарыыны хас биирдии эрэгийиэн бэйэтэ ылыныахтаах», — диэн Даванков эттэ.

Кини санаатынан, хас биирдии эрэгийиэҥҥэ үлэ биэрээччилэргэ маннык уларытыылары сүбэлиир быраабы биэриэххэ сөп. «Бу улахан содулу аҕалыа суоҕа, ол эрээри дьон кыратык да буоллар күн сырдыгын көрөр кыахтаныахтара», — дии саныыр парламентарий.

Даванков бу көҕүлээһин Госдуума билиҥҥи сессиятын чэрчитинэн көрүллүөн сөбүн эбэн эттэ. «Дьон бу уларыйыыга хайдах сыһыаннаһарын көрүөхпүт, ыйыталаһыахпыт, онтон быһаарыныахпыт», — диэн вице-спикер чуолкайдаата. Кини ону таһынан, эрэгийиэннэр үлэ күнэ хаһан саҕаланарын бэйэлэрэ быһаарар Кытай уопутугар тирэҕирэн, аан дойдутааҕы холобуру аҕалла.