Госдуумаҕа маатырыны бобуохтарын баҕараллар

Госдуумаҕа интэриниэккэ уонна социальнай ситимнэргэ маатырыны бобор туһунан сокуон барылын киллэрдилэр диэн «Газета.ру» суруйар. 

Госдуума дьокутаата Андрей Свинцов бу сокуон барылын өссө атырдьах ыйыгар киллэрбит эбит.

—  Бу сокуону ылыннахтарына, интэриниэккэ барытыгар — бары платформаларга уонна социальнай ситимнэргэ маатырылыырга бобуу киирэр. Уопсастыбаннай сирдэргэ цензурата суох үөхсүүнү, маатырылааһыны бобуу интэриниэт эйгэтигэр эмиэ киириэхтээх.

Интэриниэккэ маатыры диэн хара баһаам, онон быраабы көмүскүүр уорганнар манна бириэмэлэрин бараабаттарын курдук, «Роскомнадзор» тута блоктаан иһэрин курдук оҥоруохха наада, — диэн дьокутаат этэр.

Сокуон барылын ааптара «Роскомнадзор» цензурата суох тыллары быһаарыытыгар сигэнэр. Бу бобуулаах тылларга норуокка биллэр түөрт тыл — «х», «п», «е», «б» буукубалартан саҕаланар тыллар киирэллэр.