Госдуумаҕа олохтоохтор кыбартыыра атыылаһар кыахтара суоҕун билиннилэр

Арассыыйа олохтоохторо дьиэ үрдүк сыанатыттан сылтаан саҥа кыбартыыраны атыылаһар кыахтара суох, диэн Госдуумаҕа Тутууга уонна дьиэ-уот хомунаалынай хаһаайыстыбатыгар кэмитиэтин бэрэссэдээтэлин солбуйааччыта Александр Аксененко «Газета.Ru»-га эттэ.

Frank RG ыыппыт чинчийиитигэр кыттыбыт дьон 90%-на кэриҥэ дьиэ атыылаһыытын икки сылтан ордук кэмҥэ көһөрбүттэрин туһунан эппиттэр. Дойду олохтоохторо ырыынак бигэ туруктанан, ипотека усулуобуйата чуолкай буолуор диэри кэтэһэри ордороллор.

«Дьон билигин кыбартыыра атыылаһар кыахтара суох, тоҕо диэтэххэ билиҥҥи сүрүн ыстаапкаҕа уонна сыана үрдээһинигэр ипотека маҥнайгы усунуоһугар харчы хомуйарга хас да сыл наада. Оттон дьиэ кирэдьиитин ыстаапкалара бары рекорду куоһараллар», — диэн Госдуумаҕа Тутууга уонна дьиэ-уот хомунаалынай хаһаайыстыбатыгар кэмитиэтин бэрэссэдээтэлин солбуйааччыта Александр Аксененко «Газета.Ru»-га иһитиннэрдэ.

Дьокутаат бэлиэтээбитинэн, бородуукта, хомунаалынай өҥө, бэнсиин, таҥас-сап уонна араас өҥөлөр сыаналара эмиэ үрдээн иһэллэр, ол иһин дьиэҕэ харчы ордубат. Парламентарий түмүктээн эппитинэн, үлэ күүһэ, матырыйаал уонна логистика ороскуота быһаччы сүрүн ыстаапкаттан тутулуктаах буолан, кыбартыыра сыаната үрдээн иһэр.

«Яндекс Недвижимость» сервис дааннайдарынан, алтынньы ый түмүгүнэн Арассыыйа мөлүйүөннээх куораттарыгар ортотунан кыбартыыра сыаната маннык:

• устуудьуйа —  5,9 мөл. солкуобай (+0,7% ыйга);
• биир хостоох кыбартыыра — 7,8 мөл. солкуобай (+1,6%); 
• икки хостоох кыбартыыра — 11 мөл. солкуобай (+1,5%);
• үс хостоох кыбартыыра — 14,1 мөл. солкуобай (+0,7%).