Госдуумаҕа үлэ күнүн 6 чааска диэри кылгатар туһунан этии киллэрдилэр

КПРФ фракциятын дьокутааттара үлэ күнүн 6 чааска диэри кылгатар туһунан сокуон барылын киллэрдилэр. Бу көҕүлээһин, ааптардар санааларынан, үлэ таһымын үрдэтиэхтээх, дьон олоҕун-дьаһаҕын тупсарыахтаах уонна дойдуга демография балаһыанньатыгар үчүгэйдик дьайыахтаах.

Сокуон барылын ааптардарынан дьокутааттар Юрий Афонин, Георгий Камнев уонна Алексей Куринный буоллулар. Кинилэр РФ Үлэ кодексатыгар сөптөөх көннөрүүлэри киллэрэри туруорсаллар.

«Федеральнай сокуон барылын сыала-соруга үлэ кэмин нэдиэлэҕэ 30 чаастан уһаабат гына олохтооһун (биэс күннээх үлэ нэдиэлэтигэр күн аайы 6 чаастан элбэҕэ суох)», — диэн РИА Новости дьаһалыгар баар докумуоҥҥа этиллэр.

Итини таһынан, сокуон барыла үлэһиттэр сорох араҥаларыгар үлэ кэмин өссө кылгатары көрөр. Кинилэргэ үлэ нэдиэлэтэ 24 чаастан уһаабат буолуохтаах:

• 16 саастарыгар диэри уонна 16-тан 18-гар диэри саастаах үлэһиттэргэ;
• I уонна II группалаах инбэлииттэргэ; 
• тыа сиригэр үлэлиир дьахталларга; 
• педагогтарга; 
• буортулаах эбэтэр кутталлаах үлэлэргэ үлэлиир дьоҥҥо.

Парламентарийдар санааларынан, саҥа уларыйыы үлэ оҥорон таһаарыытын үрдэтиэ, үлэһиттэргэ истриэс уонна сылайыы-элэйии таһымын намтатыа. Онуоха эбии, үлэһиттэр босхоломмут бириэмэлэригэр эбии үөрэхтээһиҥҥэ болҕомтолорун уурар кыахтаныахтара. Бу эмиэ кинилэр дохуоттара үрдүүрүгэр тиэрдиэ. Оттон босхо бириэмэни дьиэ кэргэни кытта атаарыы, дойду демографиятыгар үчүгэйдик дьайыахтаах.

«Аныгы үйэҕэ билим уонна тиэхиньикэ сайдыыта балысханнык баран, үлэ оҥорон таһаарыыта үрдээтэ, автоматизация, роботизация уонна оҥоһуу өй систиэмэлэрэ сайдан иһэллэр. Ол иһин 30 чаас – бу аныгы киһиэхэ сөптөөх үлэ нэдиэлэтин уһуна буолар», — диэн дьокутаат бэлиэтиир.