Госпитальга эмтэнэ сытар байыастарга харысхаллары тириэртилэр

Бу күннэргэ Крым госпиталыгар эмтэнэ сытар бааһырбыт байыастар Саха сирин үөрэнээччилэриттэн харысхаллары туттулар. Ол туһунан «Cаха волонтердара» хамсааһын иһитиннэрэр.

«Добрый талисман» диэн аахсыйаҕа кыттыһан бу харысхаллары Нерюнгри, Серебрянай бор, Амма уонна Таатта улуустарын үөрэнээччилэрэ оҥорбуттар.
Маннык үтүө бэлэҕи дойдуларыттан тутуу, саамай күндү, дууһаны сылаанньытар, санааны көтөҕөр диэн байыастар махталларын этэллэр.
Сорох харысхаллары Екатеринбурга баар байыастарга, оттон үгүс аҥарын быстах дьайыыга инники күөҥҥэ сылдьар уолаттарбытыгар ыыттылар. Алгыс тыла иҥэриллибит харысхаллар ыраах сылдьар уолаттарбытын арчылыыр, араҥаччылыыр, харыстыыр ымыы буолуохтара.