Госпитальга сытар буойуттар Саха сириттэн кэһии туттулар

Ньурба улууһун Хорула нэһилиэгиттэн байыаннай дьайыыга кытта сылдьар буойун Руслан Т. инники кирбииттэн бааһырыы ылан госпитальга эмтэнэр. Манна сытааччы буойуттар Аҕа дойду көмүскээччилэрин күнүнэн Саха сириттэн кэлбит кэһии тутан үөрбүттэрин, сэргэхсийбиттэрин туһунан кэпсиир.

— Сахабыт сирин кэһиитин тутаммыт үөрдүбүт аҕай, ыыппыт дьоммутугар барыгытыгар махтал!
— Оттон бу бүгүн Чурапчыттан ЧИФКиС преподавателэ уонна студеннара Саха сириттэн кэһии, бырааһынньыгынан бэлэх аҕалтарын туттардылар: мас көтөрүн миинэ, тоҥ чыыр балык, Амма дьэдьэнэ, морс сироба, отон, халбаһы, ыыһаммыт эт, кэтилиэт, бэрэски, алаадьы, собо ыһаарыламмыт, оҕурсу, помидор, луук, сок, сакалаат, «Саха сирэ» диэн өрөспүүбүлүкэ тигэр футболката. «Биир ньыгыл Россия» партияттан эмиэ кэһиилээх кэлэн бардылар.
— Волонтердар олох бэркэ үлэлии сылдьаллар. Кинилэр үлэлэрин, дьиэлэрин быыһыгар ас астаан аҕала тураллар.
— Ханна да сахалары наһаа сөҕөллөр, олох маладьыастар, дьонноргут, Сахаҕыт сирэ көмөтүн ыыта тураллар, күүскэ өйүүллэр дииллэр. Миэхэ бииргэ сылдьыбыт Амуртан сылдьар уол кэпсээбитэ. Бааһырыы ылан Ростовка эмтэнэ сыттаҕына, автобус кэлбит, аан аһылаатын кытта «Кто из Якутии?» диэн хаһыы буолла диир. Эдэр баҕайы кыргыттар саха буойуттарыгар дойдуларыттан ас-үөл аҕалбыттар. Дьэ онно ким Саха сириттэн сылдьаллары барыларын олох ытыс үрдүгэр түһэрэн ылтара диир. Оттон биһиги, атын регионнартан сылдьааччылар, ымсыырбыппыт аҕай диэн звоннаан кэпсээбитэ.
— Оннук да этэ: Луганскайга, Ростовка, Москваҕа олох бэркэ көрсүбүттэрэ. Бастакынан убайым бииргэ үөрэммит кыыһа ас астаан эҥин аҕалта. Волонтердар туох наада диэн билсэ-көрсө тураллар. Саамай эдьиийбит диэн ытыктыыр Мария Семёновнабытыгар барҕа махтал тиэрдэбит!