Госпиталга сытар уолаттарбыт олус долгуйа күүтэллэр

Саха сирин араас улуустарыттан дойду байыаннай госпиталыгар эмтэнэ сытар байыастарбытыгар ас-таҥас көмөтө Дьокуускай куоракка күннэтэ кэлэ турар.

Бүгүн Чурапчы улууһун бааһынай хаһаайыстыбалара уонна Бахсы нэһилиэгин олохтоохторо, байыаннай госпиталга эмтэнэ сытар саллааттарга анаан хомуйбут көмөлөрүн аҕаллылар.

Бу үтүө дьыаланы Анжелика Неустроева салайааччылаах улуустааҕы тыа хаһаайыстыбатын салалтата сүрүннээбит. Чурапчылар биир туонна кэриҥэ эттэн эрийэн фарш уонна гуляш оҥорон, уонтан тахса куул балыгы ыһаарылаан, ону сэргэ кус, арыы, барыанньа, сироп киллэрбиттэр.

«Саллааттары өйөөбүт бааһынай хаһаайыстыбаларга, аһы астыырга көмөлөспүт Чурапчы нэһилиэгин оскуолаларыгар, физическэй култуура институтугар, Чурапчытааҕы кэллиэскэ, олохтоох көҕүлээһини өйүүр ааҕыныстыбаҕа, урбаанньыт Валерий Семеновка саллааттар уонна кинилэр дьиэ кэргэттэрин ааттарыттан махталбытын тиэрдэбит», — диир Аҕа дойдуну көмүскээччилэр эрэгийиэннээҕи кэмитиэтин салайааччыта Светлана Диодорова-Лаврентьева.

Дьон бэйэтэ ис сүрэҕиттэн көмөлөһөр, онтон уолаттар олус долгуйаллар уонна үөрэллэр, кинилэр биһигини күүтэллэр, кэтэһэллэр диэн эбэн эттэ кини.