Госпитальга сытар уолаттарга таһаҕаһы ыыттылар

Соторутааҕыта Орто Халыма улууһун уонна Чурапчы улууһун Мугудай нэһилиэгин олохтоохторо Санкт-Петербург куорат госпиталыгар сытар бааһырбыт уолаттарга, биир дойдулаахтарыгар көмө быһыытынан таһаҕаһы ыыттылар. Бу туһунан Аҕа дойдуну көмүскүүр буойуттар дьиэ кэргэттэрин кэмитиэтин Саха сиринээҕи салаатын салайааччы Светлана Диодорова-Лаврентьева иһитиннэрдэ.

Кини Запорожскай уобалас, Донецкай уонна Луганскай өрөспүүбүлүкэлэ байыаннай госпиталларыгар эмиэ сырытта. Манна Саха сириттэн сылдьар байыаннай дьайыы кыттыылаахтара эмтэнэ сыталлар.

— Саха сириттэн ыҥырыллыбыт байыастар өрөспүүбүлүкэ салалтатын уонна биир дойдулаахтарын, уопсастыбаннай түмсүүлэр өйөбүллэрин, көмөлөрүн билэн сылдьаллар, — диэн Светлана Диодорова-Лаврентьева кэпсээтэ.

Байыастарга ким баҕарар көмөлөһүөн сөп. Ол туһуттан Аҕа дойдуну көмүскүүр буойуттар дьиэ кэргэттэрин кэмитиэтин Саха сиринээҕи салаатыгар байыастарга аналлаах табаардары, бородууктаны илдьэн биэриэххитин сөп диэн СИА суруйар.