ГОСТ ирдэбилигэр эппиэттээбэт арыгынан эргинээри тутуллубут

Ленскэй оройуонун олохтооҕо маарката суох, ГОСТ ирдэбилигэр эппиэттээбэт арыгынан эргинээри сууттаммыт. Ол курдук, 60 саастаах эр киһи 17 374 бытыылка арыгыны биллибэт киһиттэн ылан маҕаһыын ыскылаатыгар кистээн сытыарбыт. Арыгы уопсай сууммата 4,7 мөл. солкуобай сыаналаах эбит.

Бу киһи дьайыылара сокуону кэһэн туран оҥоһуллубуттарын билэ-билэ, манан эргинээри сылдьыбыт.  Сокуону кэһээччи былаана СӨ УФСБ үлэһиттэрэ суһал тэрээһиннэрин түмүгүнэн ыһыллыбыт. Эр киһи буруйун билиммитинэн, үчүгэй характеристикалааҕынан уонна сааһа аҕамынан суут кинини услобунай болдьоххо биир сыл уурахтаабыт. Эр киһиэхэ ыстараап олохтооботохтор.

Суут быһаарыыта күүһүгэр киирэ илик диэн СӨ сууттарын пресс-сулууспата иһитиннэрэр.