«Госуслуги» порталга байыаннай дьайыы бэтэрээннэригэр анал раздел баар буолла

«Госуслуги» порталга байыаннай дьайыы бэтэрээннэригэр уонна олохторун толук уурбут байыастар дьиэ кэргэттэригэр социальнай өйөбүллэр миэрэлэрин туһунан анал раздел баар буолла. Билигин бары чэпчэтии туһунан информация биир сиргэ түмүлүннэ. Бу туһунан РФ Сыыппараҕа, сибээскэ уонна маассабай коммуникацияларга министиэристибэтэ иһитиннэрэр.

Саҥа разделга «Аҕа дойдуну көмүскэччилэр өйөбүллэрин миэрэлэрэ» («Меры поддержки для защитников Отечества») диэн ааттанар. Онно маннык информацияны булуохха сөп:

• ханнык чэпчэтиилэр байыаннай дьайыы бэтэрээнигэр көрүллэллэрий?
• босхо эми-тому ыларга, реабилитацияны ааһарга, психологическай уонна паллиативнай көмөнү ыларга тугу гынабыт?
• санаторийга путевканы туһанарга туох нааданый?
• өлбүт байыаннай дьайыы кыттыылааҕар дастабырыанньаны оҥорорго хайыыбыт?
• эми-тому биэрбэт буоллахтарына тугу гынабыт?
• реабилитациялааһын тиэхиньиичэскэй сириэстибэлэрин ыларга тугу толоробут?
• хайдах үөрэххэ уонна үлэҕэ киирэргэ көмөнү туһанабыт?

Ону таһынан РФ Сыыппараҕа, сибээскэ уонна маассабай коммуникацияларга министиэристибэтэ уонна «Аҕа дойдуну көмүскээччилэр» пуонда «Госуслуги» порталга «Макс» диэн роботка сыһырыаллыбыт чат-боту  үлэҕэ киллэрдилэр. Чат-бот понда үлэтин туһунан сиһилии кэпсиэҕэ уонна бэтэрээннэргэ, ону тэҥэ кинилэр аймахтарыгар ыйытыыларга хоруйдуоҕа. Билигин олоххо киирбит баар бары өйөбүллэри туһаныы бэрээдэгин сыппараҕа көһөрүү үлэтэ барар.